Tura, June 18, 2022: Garo Students Union (GSU) Rongkhon Sub Unit, jean GSU Western Zone, Dadenggre-ni bipek ong•achim, Dadenggre Sub-Division-ni ning•o ga•akgipa Rongkon aro Chigitchak songrango jasa bate bijoli dongjani a•sel neng•nikaniko man•enga ine parakataha.
“Dadenggre Sub-Division-ni ning•o donggipa Rongkon aro Chigitchak jolrangoo jasa bate bijoli dongjani a•sel bang•a manderang neng•nikaniko man•enga. Iani a•sel bang•a manderang phone-rangko charging ka•na, office-rango kam ka•na man•jaenga aro salanti kamrangko ka•anio namen neng•nikaniko man•enga. Mongsongbate Matric aro klas 12 porikka pass ka•gipa chatro chatrirang an•tangtangni nanggipa lekkarangko download ka•na man•jaenga. Uasan ong•aigija jadokni porikkarang a•bachengna am•engon bijoli gri andal mindik dongna nangenga. Indake bijoli dongjani a•selo poraigipa bi•sarang neng•nikaniko man•enga. Chinga A•bri jolo donggipa manderang bijoli dongjani a•selo bang•a neng•nikanirangko chagrongna nangenga. Uni gimin MePDCL Department-ni manderang ta•raken bijolirangko tarie on•a nanga” ine GSU Rongkon Sub Unit-ni President Nasen Ch Momin parakataha.