Shillong, June 18, 2022:Meghalaya a•dokni dingtang dingtang bakrango mikka jimbee waani a•sel Sukrobar pringo sak 13 manderang janggitangko gimaataha ine ine a•jani pulis department-rang parakataha.
East Khasi Hills a•jani Balat sepango donggipa Dangar songo a•a rudapachi nokdang ge•sani manderang janggitangtangko gimaataha. Sianggipa manderanga bilsi 32 ong•gipa Kylliti Rangpeng aro sakbri dedrang baksa jadok ong•gipa me•asa bi•sa ong•aha. Apsandake Ryngku songni bilsi 7 ong•gipa chadambe a•a rudape janggitangko gimaataha.
Uandake Betgora A songni bilsi 7 onggipa me•a bi•saba nokko a•a rudape janggitangko gimaataha.
Apsandake Khasi Hills a•jani Kynmensaw songo me•chik saksaba noko a•a rudape janggitangko gimaataha. Uni segipa Robino Kynter-ko a•a rudape sandion man•kujaenga ine u•iataha.
Koborko man•soani gitade, a•sel ong•gipa biaprangona Disaster Relief Team-ko watatahachim, indiba Mawsynram-Balat ramarango a•a be•dalanichi champengako man•ne sokangna man•jaha. Ramao a•a be•dape garirang re•aniko champengatani gimin JCB-rangko watataha ineba koborna parakataha.
South Garo Hills a•jao Sukrobar pringo a•a rudapani a•sel sak bri manderang janggitangko gimaataha. Baghmara Bolsalgre gittimo nok para ra•e dongenggipa nokdang ge•sa Tengkam A Sangma segipa Gamchira Ch Sangma jikgipa aro bilsi bri ong•gipa depante saksa janggitangko gimataha.
Uandake Siju-ni Kasinchi R Marak-ba a•a rudape janggitangko gimaataha ine koborko man•aha.
South West Khasi Hills a•jani Lalghat songo BSF saksa a•a rudapako man•e siaha ine koborko man•aha.
A•dokni Skotong Minister Conrad Sangma, sianggipa manderangna kalimpaaniko parakatenba duko ga•akenggipa nokdangni manderangna sianggipa sakprako tangka gong lak 4-ko on•gen ine parakataha.
Shella-Bholaganj Blockni ning•o donggipa Pdengshnong Sohra songni R Khongsit-ni noko a•a be•dape nosto ong•ako man•aha. Apsandaken Mawkynrew Blockni ning•o ga•akgipa Mawjam songni Shidalin Suting-ni nokba apsan obostao ga•ake nosto ong•ako man•aha.
West Jaintia Hills a•jani Darrang songo a•a be•gruani a•sel Darrang-oni Shnongpdeng re•gipa rama champengako man•aha aro a•arangko sorokoni jitgale galna nangenga ineba u•iataha.
A•doko mikka jimbee waanichi SGH a•ja gita jokangenggipa Simsang Chibima dal•ani a•sel bang•a song nokrang, anti bajar-rang hospital-rang aro petrol pumprang chi sripako man•aha. Indake SGH a•jani mongsonggipa dollongrang jekai Rongara dollong, Karukol dollong, Rongdik dollong aro Mahadeo dollong nosto ong•ako man•aha ine kobor man•aha.
South West Garo Hills a•jao dam 107 songrang aro sak hajal 32,000 manderang chi banna re•ani a•sel neng•nikaniko man•enga ine koborna parakataha.