GSMC Chokpot ramako blacktopping on•china Skotong Minister-ko mol•mola
Tura, January 16, 2022: Garoland State Movement (GSMC) H.Q.Tura, January 15 tarik Sonibar salo a•dokni Skotong Minister Conrad K Sangma-ko gronge, Chokpot jolni rama jal•angrang namsrangjani a•sel songdongenggipa manderang neng•nikaniko man•engani gimin, ua rama jal•angrangko namdapate on•china mol•mole memorundum-ko on•angaha.
GSMC-HQ, Tura-ni Assistant General Secretary Cyril A.Sangma-ni parakatani gitade, blacktopping on•dapna nangenggipa rama sorokrangara Dadinggre, Chandigre, Darinanggre, Sabiagre, Boldamgre, Wategre, Rongta Ku•sik, Dompai aro Dendamgre songrangan mongsonggipa ong•achim, maina ua songni manderang neng•nikaniko man•batenga ine janapataha.
Wachi karini somoio rama sorokrango a•a stapgipa aro chibolrara ong•ani gimin gari gorarang re•na man•jae songni manderang ja•achi re•na aro olna kena nangenga. Uni gimin songni manderang iandakpile neng•nikanirangko man•enga ineba janapataha. Uandakgipa neng•nikanirangko chakchikna man•jae, Chokpot jolni rama jal•angrangko taridape on•pachina re•anggipa 2021 bilsini December 8 tariko songdongenggipa ma•gipa-pagiparangni okamatako man•ne, GSMC-ni dilgiparang Skotong Minister-ko gronge ua rama jal•angrangko namdapatchina mol•mole segipa Memorundum-ko on•ahachim.
Indiba da•alona king kingba taridape on•kujaengani gimin manderangni neng•batenggipa sorokrangko blacktopping on•china dabiangtaiaha.
Ua sorokrangara Chokpot Raja Rongat Nokpate skuloni Sabiagre songona re•anggipa sorok gita Wategre songona blacktopping on•china dabiani ong•achim. Raja Rongat Nokpate skuloni Dendamgre LP. skulona km 1 mangni gita blacktoppingko on•aha, indiba ua sorok nosto ong•ahani gimin uko taridape on•china gita janapdape molmolaangaha. Mongsongbate Dendamgre LP Skuloni Sabiagre song gita Wategre-ona blacktopping on•e tarichina tangka paisarangko on•atpachina GSMC-ni AGS janapjolangaha.
Gniggipao uamangni dabienggipa sorok Dadinggre junction-oni Boldamgre songona jean km 1 mangko blacktopping on•china aro
gittamgipao uamangni nangnikgipa sorokara Dadinggre-oni Darinanggre songona komibeoba km 4 mangko blacktopping on•china bi•aha. Uamangni nangnika gita GSMC, Skotong Minister-ko gronge sorokrangko chu•sokate on•pachina memorundum-ko on•angtaiaha ine Cyril A Sangma u•iataha.