Shillong, Sept 16, 2022: A•dok sorkari a•doko Casinos joa kal•aniko a•bachengatna miksonganiko ra•galpilaha ine Skotong Minister Pa Conrad Sangma Bristibar salo party meetingo parakataha.
Ia casinos joa kal•aniko Mondolini dilgiparang, pressure grouprang aro gipinrang a•doko joa kal•aniko namnikgija jegalani gimin ra•galpilaha ine parakataha. Iani ja•mano ge•gittam dolrangna on•gimin raikoba ta•raken ra•galgen ine kobor ra•timgiparangna Pa Sangma aganaha.
Autonomous District Council (ADC)-o CrPC aro CPC-ko ra•gatani gimin sing•anirangna, Skotong Minister aganchakengon, iani bidingo MDC-rang baksa chanchianiko dakgen ine aganaha.
Skotong Minister-ni aganani gitade, ia CrPC aro CPC-ko ra•gatanio maming dakeba District Council-ni bilko gimaatjawa. A•dok sorkari maming saloba manderangni kosako indakgipa kamrangko ka•na miksongani dongja, gimikni gitan name chanchiesa kamko ka•anggen ineba Pa Sangma aganaha.
Skotong Minister, Party Office building nokko rikani gimin aganangengon, NPP office-ko rikanio pilak nanggipa lekkarangko tarimanesa rikgen ine aganaha.
RTI activist Disparsing Rani, Butbar salo NPP da•onaba bolrangko den•na aro building nokko rikna Deputy Commissioner-ni permission-ko man•kuja ine aganaha.
Unbaksana minggipin ong•enggipa obostara a•dokni Pinemount Skulo sera bera ong•ani bidingo Education Department-ni report-na sengenga ineba aganaha. Iani bidingo department chu•gimik pakwate on•na nanggen ine Pa Sangma aganchakaha.
Batanggimin somoio Pinemount Skulni skigiparang aro chatro chatrirang skulo ong•enggipa obostarangko jegale Principal-ko ra•galchina dabie jingjengataniko dakangaha ineba agandapataha.