Rajya Sabha MP aro TMC State Incharge, Richard Marak-na campaign ka•anga

Tura, January 17, 2022: Rajya Sabha-ni MP Derek O’ Brien aro TMC State Incharge Dr. Manas Ranjan Bhunia, South Tura-ni TMC Candidate Richard M Marak-na Sombar attamo Tura Modynagar-o tom•aniko ong•atangaha.

Uamang South elakkani manderang baksa interactive session-ko ong•atange, Conrad Sangma bilsi bongani gisepo elakkatangni manderangna maiko dakaha, uarangko sing•aha. Tom•anio bakko ra•anggipa manderangni u•iatani gitade, Conrad Sangma-ni dilanichi MDA sorkari bilsi bongani gisepo maming dakchakaniko on•jaha ine aganaha.

Bakko ra•gipa manderangni matnanganiko knae MLA Candidate Richard Marak, “Anga Conrad baksa susana ka•donga. Indiba biko nangnikgijaniko mesokna aro dingtanganiko ra•bana an•ching ku•cholsan ong•e kamko ka•na nanggen. Maina an•chingni dilgipa TMC dolko baseaha? An•ching sakantini bal bojako chile an•chingna tom•tomaniko ra•bana TMC dolko baseaha. Chinga pilak oboston na•simang baksa chadengpae, na•simangni dalgrikanio watgalgija chea chejana kingking krenge kamko ka•angen” ine aganangaha.

A•dokni TMC Incharge Dr Manas Ranjan Bhunia, “An•chingna ka•sae eleksino susaenggipa Te Richard Marak saksa matgrik ong•a. Ua matgriksan ong•aija, indiba na•simangni adatang, jonggipa, ripeng aro saksa socialist-ba ong•a. Ia elakkani manderangna warachake kamko ka•na an•tangko on•kangaha. Uni on•kanganiko aro dilgipa ong•na re•mikkanganiko nike an•ching pilakan una ka•saaniko on•pilskana” ine aganangskaha.

TMC a•dokni me•chikrangna WE Card-ko bikote on•aha. Iako bikotanichi chinga a•dokni me•chik dolna uamangni pilak nanganirangko chu•sokatna gita dakchakaniko on•na miksongenga. South Tura-ni sak hajar 40 me•chikrang TMC dolo ka•donge bimingtangko segataha. Unbaksana MYE Card-koba bikotaha, jenan a•dokni chadamberang ka•donge bimingtangko segattokaha ineba ua agandapangaha.