Tura,Jan 17, 2023:Tura-ni MDC aro BJP Spokesperson Bernard N.Marak, Ma•mong sorkarini on•atenggipa dingtang dingtang scheme-rangko MDA Sorkari cha•bokani gimin parakataha.
Bernard Marak-ni parakatani gitade, ma•mong sorkarini on•atenggipa scheme-ranga Subhagia rural electrification, nokantio bijoli ching•atani, ia scheme-ko Tura-oni km 12 mang re•angon nikna man•gen, da•alona kingking indakgipa songrangona bijoli sokuja, indiba lekkaode sokmanjok. Post ra•baenga songenga photo ka•e ra•angenga gipinona oke ra•angpilenga.
Ia indakgipa gadangona sokenga an•chingni development ingipa, mesokgipa developmentsa ong•aia, practically nokoni nokona bijoli sokani, nokoni nokona chi sokani, nokantiona mirong sokani iarang gimikan chu•sokjaha. Jeni gimin da•alo ma•mong sorkari NPP sorkariko dilenggipa Skotong Minister Conrad Sangma-ni kamko suk ong•nikja aro kusi ong•jaha.
Skotong Minister Conrad Sangma baksa susaengon, anga South Tura-o political padotrangni jako seokako man•ne anga bilongen kusi ong•a. Maina angna tuft ground-ko on•a aro anga ia ground-ko maidake chena man•gen, ian angna rakbegipa ga•batna nangani ong•enga. Indiba anga ma•sia Tura-ni manderang ma•sina ja•man chakja. Da•o eleksin ong•na am•osa tinko sualpetpetenga, Focus-ni tangkako party-ni scheme dake on•petpetenga. Bilsi 5-o maming develop ka•gijaniko da•o eleksin-na skang mangmang tinchi, tangka on•anichi sanaba me•dik sam•dik on•anichi, jersy-rangko on•anichi vote-ko salna jotton ka•enga.
Iako manderang ma•sina ja•manchakja, uni gimin, South Tura-ni eleksin bilongen ga•suna sienga aro interesting-ba ong•enga. Meghalaya gimik, India gimik South Tura-ko nigame dongenga, mai ong•enga aro mai ong•na sienga. Uni gimin manderangni ku•mongani, bakrimani aro gisiksan ong•anichi cha•bokaniko bon•atna, kakket ong•gijaniko gimaatna aro party-tangni mandenasan kam ka•e tangka gimikko, scheme-ko aro project gimikko oke cha•aniko bon•atna ang baksa bakrimgen ine anga ka•donga.
Iandake namgija kam ka•aniko maidake ra•chakna man•gen, da•alo kror-ni kror tangkarangko on•atengon, name kam ka•chinasa on•atenga. Songanti, nokantion sorok sokaha ine agana, indiba da•alo sokatenggipa tangkaranga ma•mong sorkarioni ong•a. Jeni gimin da•alo saksa minister-ni ja•mano saksa Garo Hills-ona napbaenga, report sokangmanaha ma•mong sorkariona. Uni gimin ia kamrangko name ka•ama ka•ja, jekai mijao John Barla re•bae, an•tangni project gimikko niangaha. Uni ja•mano Rupala Fishery, Annimal Husnadry aro Veterinary-ni Miniater re•baha, uni on•atgipa National Livelihood Mission (NLM), wak jilna, do•o aro bo•bok jilna on•atgipa tangkarang bachi gimaangjok. Jensalo ua re•baha unosa rang•gitik wak sualenga, lekkaode sualmanjok, indiba practically-de sualkuja, uni giminsa Miniater-rang sandibaengaha.
Uni gimin.manderang iako ma•sina ja•man chakna nangja, da•alo ia cha•boke cha•aniko ra•chakaikugenchimode, ia sorkari salsao jat gimikko gimaatgen. Maina cha•bokanichi an•ching da•alo maming scheme-rangko man•rikjajok.Party ge•sani manderangna agre scheme-ko, contract-ko facility-rangko man•jajok. Minja mangmang YESS-ko sualaha, YESS-de Proposalo club ge 3000-na bate Registered Society, Club, Organisation-rang Meghalaya-o donga, iarang gimikna lak prak facility-ko ra•baanichim.
Indiba jadokna komigipa club-rang, association-rang ia scheme-o apply ka•na man•ja, indiba nikna man•enga, jadok batgipa club-rang ge•saba apply ka•na man•rikjajok. Indiba party ge•sani manderang salsani gisepo register ka•gitike, salsani gisepon bank account kulie, NPP party-ni Youth group-rangsa club bikote YESS-ni tangkako oke ra•enga, iara Scam ong•jama? Uni gimin angni dakgrikanide gimik club-rangan man•na nanga. Register ka•gipa 3000 club-rangko mesoke sorkari tangka ra•baha, ua club-rangsa ia tangkako man•na nanga, mijamangmang bikotgipa club-rang man•na nangja. Uni gimin Garo Hills-ni manderang iako u•ina nanggen, YESS-de jadok batgipa register ka•giminrangsa apply ka•na man•a ine aganaha.
Ia cha•bokaniko bon•atna ang baksa bakrimaniko niksona gita Meghalaya a•dok gimik nichaksoe dongenga, uni gimin ka•dongen aganna man•aia, anga amaigen. Anga amna gita namen ka•dongsoenga.Maina Tura-ni manderangde tangkana re•gipa ong•ja, Tura-ni manderangde te•rik mesoko boloni ong•ongipa amak ong•ja. Uni gimin indakgipa politics-ko Tura-o bon•atna gita manderang ang baksa ku•monggen ine anga bebe ra•a. Dingtanganina aro jatni a•songni tang•doanina angna vote ka•gen ine anga ka•dongsoenga ineba aganaha.