Tura, Nov 10, 2022: Garoland State Movement Committee (GSMC) HQ, Tura-ni Organising Secretary Jaaon Tekrang M.Sangma, NPP dilgipa Dr WR Kharluki- ni agangipa Kattana suk ong•jae aganchakatskaha.
Uni aganchakatani gitade, “Chong•motan A•chikrang 1800 bilsirangonin dingtang dingtang gadango ong•e dingtang a•dok ba Garoland-na dabibaenga, uni gisepon a•dokni Rajhya Sabha MP aro NPP-ni State President Dr Kharluki-ni Megahalaya-ko bak dakjachina agangipa Kattarangko raken jegala. Ian skia man•gijagipa mandeni Katta agana baksa maming dakeba dingtangja, nipilatgenchimode, re•anggipa 2014 bilsini MP election-o NPP-ni dilgipa P A Sangma-ba Garoland issue-ko ra•e election campaign ka•aha aro Garo Hills-ni manderang dingtang a•dokko nangnike, una vote on•ani a•sel cheaha. Ua chegipa ong•ani ja•mano ua Parliament-oba Garoland-ni gimin aganangaha uni gisepon da•alo NPPni State President ong•pile, Dr Kharluki-ni chanchiningija agananira A•chikrangni gisiko sa•dikatani ong•a aro P A Sangma sagini agangipa Kattarangko mande ra•gija aganani ong•aha. Uni gmn ua saksa a•dokni pagipa ong•e je Kattarangko aganengachim, simsake agana nanga. A•chikrang maini gmn dingtang a•dokko nangnikenga, ma•sina sikode, A•chik a•songona re•bae skie ra•na gita man•gen. Chingna A•chikrangna Garolandko nanga aro mikkangchiba chinga A•chikrang Mandal den•tik, den•tike changong bilbatbate, Dakgipa Rugipa, Mareru Marebak, Kosapak Kosapin Ba’bra-ni pattianggipa a•dokko map waring salna dabianiko dontongjawa” ine parakataha..