PRIME chadamberangna cholko on•enga  

0

Shillong, Jan 16, 2023: Meghalaya-ni chadamaberang bang•a dingtangatanirangko ra•banasigiparang ong•a.

Bilsi 5-na skang, kamgri ong•aniara Meghalaya-o mongsonggipa neng•nikani ong•achim.

Jensalo NGT koila bikotaniko dontongataha, manderangni janggi tanganirang rang•san tang•onaha aro maming chol dongjaha. Ua somoio a•dokni skotong minister Dr Mukul Sangma chadamberangna janggi tangani cholrang namen chu•sokgijani ong•aha.

Karkanarang donggijani a•sel gipin janggi tangani cholrang dongjaha aro changa-sapanirangko skiani program-rang donggijanichi a•doko namen neng•nikanirangko man•aha.

Indiba Conrad Sangma-ni dilenggipa MDA sorkari ia obostako namatna gita namen rakbee kamko ka•aha. Uni sasonni somoio bang•batan Covid-19 sabisiko man•ne neng•nikanirang sokbaaha. Indake ong•engon, a•dokni chadamberang nampilna maming ka•donganiko nikjaha. A•doko bilsi 20 aro 40 ong•gipa manderang lak 11.5 gnang. Ian a•doko songdonggipa manderangoni 30% ong•enga aro janggi tangani cholrang namen komia, indiba manderangni changa-sapanirang bang•batroroenga ine nikna man•aha.

Indake ong•engon, dingtangmancha cholko dakna nanganio ga•akaha. Conrad Sangma an•tangan bading-chiwalaniko dakgipa mande ong•e, ia cholko bikotaha. Kamrangko sandigiparangna kamrangko on•na gita tariaha. Indake PRIME Meghalaya-ko a•bachengataha. Ia program-ni gita manderangko skie on•na, kam ka•togipa biapko on•na aro a•doko bading-chiwalgiparangko nambatatna miksongaha.

Iano minggni kamrangko ka•na miksongaha, bading chiwalna aro uko chu•sokatna, minggipin bading-chiwalaniko chonne a•bachengode, uko dal•dapatna. Uandaken PRIME scheme chadamberangna cholrangko on•enga, indiba mikkang jao election-rang ong•anichi, ia PRIME-na maiba ong•genma?

Da•alona kingking sak 1,500 bading-chiwalaniko a•bachengdilgiparangna PRIME dakchakaniko on•aha.Tangka paisarangni bidingo dakchakani, skie on•ani, agan-ku•pattiani aro kam ka•dimani biaprangko on•ani ong•a.

PRIMEni bang•a chu•sokgiparang donga. Tangka paisarangni bidingo dakchakaniko man•gijanian mingsa bading-chiwalaniko a•bachenggipa manderangni mingsonggipa neng•nikani ong•a. Bank-rangoniko srona gita altuae man•gijanian micro, nano aro solo enterprise-rangna mongsonggipa neng•nikani ong•a.

Tura-ni, Semada Marak PRIME-oniko bilsisana baten dakchakaniko man•engaha.. Dingtang dingtang u•i-ma•sigipa badingg chiwalgiparangko ua grongaha aro agan-ku•pattianiko man•aha. Uni chanchisoanirangko namdapataha aro bading chiwalanirangko namdapate dingtang dingtang cholrangko mesokaha.

Ua biaptangni me•chikrangko rimchimonge dingtang dingtang rikgitokrang, natapsirang aro uandakgiparangko tariaha. PRIME a•bachengao lak 5-ko on•a, indiba ja•mano dal•dapatna lak 25-ko sut gri srona on•a.

Sohra-ni Ryngud songo Odreena Gracia Shangpliang, jean O’Shan Organic-ni nokgipa ong•a, ua chasongnaba an•tangni chu•sokaniko jumang niksojachim. Uni kam ka•anuo ua bija bitchi, Citrus Maceoptera juice aro dingtang dingtang bosturang jekai Lakadong holdi, gulmoris, aro e•ching ginderangko tarienga.

Ua CM E-Championship challenge-oni nambatgipa sak 25 bading chiwaldilgiparangoni saksa ong•a. Una kam ka•giparang bang•batan songsul-noksulni me•chikrang ong•a. Ua bading-chiwalaniko dal•dapatna miksongenga aro bang•bata manderangko rakkina chanchienga aro PRIME-ni on•gipa kam ka•chakani biapko J.N. Stadium-ona jitna chanchienga.

Ua dontonggija tikkelanichi ton 30 bosturangko June 2021 bilsio Mumbai-oni badinggipa am•ataha. Sohra-o donggipa manderangna janggi tangani cholrangko on•gen. Adita salrangna skang, AITC-ni MYE card ingipa gital scheme-ko parakataha, jeon lak 3 chadamberangna kamrangko on•na ku•chakaha. Ia apsan chadamberangkon ia scheme-ko a•bachengatgiparang galchipahachim. Da•o uamangna West Bengal-ni agan-skie on•giparangoniko skie ra•aha ine parakataha.

Indiba West Bengal a•jara da•o pangnana bate silroro namroroanirang dongjaenga. Je a•dokon changsao karkanarang bang•e dongachim, da•o TMC-ni sasono mamingan dongjaha. Ia apsan political party-an Ratan Tatani karkanao sak 10,000 kam ka•e cha•giparangko tol•e an•tangtangni man•gnina a•dokoniko a•rikgalaha MDA sorkari parakataha.

Indake Bengal-ni chadamberangna maming cholrangko on•na man•jaha. Indide, iandakgipa Bengal-ni dilgiparang maidake an•chingni chamderangna cholrangko on•gen? PRIME-ni kam ka•ani aro mikkangchi chu•sokanirang da•o Meghalaya-ni manderango pangchaka, chong•motan Meghalaya da•o Singur gita chacha ong•genma, je biapon Tata Motors Factory-ko West Bengal-o a•bachengatna siengama? PRIME Meghalaya-ni chadamberangna janggi tangani cholko on•genma, ine chadamberangni sing•ani ong•enga.

Leave A Reply

Your email address will not be published.