Resubelpara, January 17, 2023: Re•baenggipa MLA Eleksin-na bilake tarisona ba Campaign ka•na gita West Bengal-ni Skotong Minister aro AITC-ni Chairperson Mamata Banerjee Budbar salo North Garo Hills-ona re•bae, TMC-ni tom•anio bakko ra•anggen ine parakataha.
Ian Mamata Banerjee-ni Meghalaya a•dokona re•baani gnigipa chang ong•gen. Ua re•anggipa bilsini December jao a•dokona skanggipa changna re•baaha. Indake ua skanggipa changna re•baani somoio me•chikrangna dakchakaniko on•na aro bilakdapatna gita Women Empowerment (WE) Card-ko a•bachengate on•angaha.
WE scheme-ko oprakani adita sal ja•mano kam gri roenggipa a•dokni chadambeangna Meghalaya Youth Empowerment (MYE) Scheme-ko a•bachengatskaha. Indake ia 2023 bilsio TMC dolko sorkari rikna chol on•genchimode, WE card aro MYE card Scheme-ni gita japrako gong 1000-ko me•chikrang aro bilsi 21-oni bilsi 40 ong•gipa chadamberangna on•gen ine ku•rachakaha.
Indake WE Card Scheme-o sak lak 3 me•chikrang bimingtangko segataha, uandake MYE card Scheme-o hajar 90-na bate chadamberang bimingtangko segataha ine u•iataha.
Mamata Banerjee aro TMC-ni General Secretary aro MP Abhishek Banerjee tom•anio bakko ra•anggen. Unbaksana TMC-ni Rajya Sabha MP Derek O’Brien, TMC Meghalaya incharge Manas R Bhunia, a•dokni President Charles Pyngrope aro Opposition dolni dilgipa Dr Mukul Sangma tom•anio bakko re•anggen ineba parakataha.
Ia tom•aniko Mendipathar-ni Dilma A•pal Playground-o ong•atanggen ineba u•iataha.