Ampati Degree Kolege-ni Principal-ko ra•galchina AHAM dabia
Tura, March 28, 2022: A•chik Holistic Awakening Movement (AHAM) South Western Zone, Ampati Degree Kolege-o chu•onga gita bida donggijagipa mandeko Kolege-ni Governing Body Principal songaniko raken jegalataha. “Ampati Degree Kolege-ko a•jani A•chik sikarang ku•mong nangrime kuliaha aro iako kulimitingo darang rori jatba dakchakaniko on•pajaha. Ia kolege-ko da•ona kingkingba A•chikrangni krenge dakdilgipa Community Kolege ine Meghalaya sorkariba ma•sia aro unbaksana ‘People’s Grant-in-Aid Scheme’-koba man•paenga.
Chinga AHAM, Manmunur Rafique Mondol Willy-ko Ampati Degree Kolege-ni Principal songaniko raken jegala. Ua Principal ong•na chu•onga gita bida dongja aro uano National Eligibility Test (NET) ba PhD degree-ba dongja. Indide ua maikai Kolege-ni Principal ong•e kamko ka•anggen ineba sing•doangaha. Uni gipin Certificate aro Qualification-rangko Institution-ona re•ange kakket ong•ama ong•ja uko sing•sandina gita nanggen. Unbaksana Ampati Degree Kolege-o Education aro EVS subject-ko skina rorirangko seokaha, a•jao poraia skia matchote chu•onga gita bida donggipa manderang donggenchimoba, A•chik Jatko galchange Assam a•dokni Roriko seokskahani gimin, Ampati Degree Kolege-o State Reservation Policy-ko ra•gate dakna nanggni niamrangko ja•rike kragipa skigipako seokna nangchongmota” ine AHAM South Western Zone-ni General Secretary janapataha.
“Chinga AHAM-ni gita a•jatangni kolege-o rorirangni ra•gope sason ka•na jotton ka•aniko raken jegala. Uni gimin Kolege-ni Governing Body, State Reservation Policy-ko ra•gatna nangchongmota, a•jatangni kragipa manderangko kamna seokchina, chu•onga gita bida donggijagipa Manmunur Rafique Mondol Willy-ko Principal-ni kamoniko ta•rake ra•galenba uni palo a•jani skia poraia donggipa mandeko seokskachina AHAM mol•molangaha.