Tura, April 27, 2022: Dalu jolni nangrimgimin NGO-rang Garo Students Union (GSU) Dalu Regional Unit, A•chik Students Welfare Association (ASWA) Dalu Regional Unit, FKJGP Dalu Circle aro GSMC Dalu Regional Unit Budbar salo a•dokni Skotong Minister Conrad Sangma-ko gronge, uamangni segimin lekkako on•eaha.
Dalu-o donggipa Phukan Memorial Kolege, Dalu jolni wilwilao donggipa songrang Ruga, South Garo Hills a•jani Gasuapara, South West Garo Hills a•jani Purakhasia, West Garo Hills a•jani Sampalgre aro Kerapara songni jangchigrik biapo donge bang•a songni poraienggipa chadamberangna dakchakaniko on•enga.Ia kolege bang•a kangal cholgri manderang jean gipin a•jachi re•ange poraina chol ong•pajachim, uamangba miksongatangko chu•sokatna bang•a dakchakaniko on•a. Phukan Memorial Kolege Garo Hills a•jani Private Kolege-rangni gisepo ta•rakbate dal•droenggipa kolege ong•a. Ia kolege-ko 2001 bilsini July 18 o kuliaha. Indiba ia kolege-ko sorkari jako ra•kujani a•sel skigiparang bang•a neng•nikanirangko chagronga.
Ia kolege-o pangchake aro ka•donge bang•a chadamberang miksongatangko chu•sokatna poraitokenga, ia kolege-ko sorkari jako ra•na nangchongmota aro dakchakanirangko on•na nangchongmota ine NGO-rang janapataha.