Tura, July 3, 2022: Tura NEHU Campus-o poraienggipa Post Graduate Students’ Union (PGSU), Sukrobar salo West Garo Hills a•jani Deputy Commissioner-na lekka sedoatenba, Tura NEHU Campus-ni Administration-ni kosako badi ka•angaha.
PGSU-ni janapata gitade, Tura NEHU Campus-o poraienggipa aro kam ka•enggipa adita sak manderang COVID-19 sabisiko man•aha. Iani a•selo chatro chatrirangni ong•nasienggipa porikkarangko sena jajrengtokenga. Koborko man•soani gitade, Shillong NEHU Headquarter, porikkarangko donsogimin salon ra•anggen. Uni gimin Tura NEHU Campus-ko nirok simsakgipa, Covid positive man•gipa chatro chatrirangko porikka sena dingtang kuturirangko tarie on•china dabiangaha. Uamangna dingtang kuturiko on•genchimoba, apsan campus-on donge apsan washroomko jakkalgenchimode, COVID-19 sabisi batna altugen ineba janapataha.
“Tura NEHU Campus ning•osan Covid sabisiko man•gipa chatro chatrirangsan ong•aija, indiba campus-ni a•palo donge poraienggipa chatro chatrirang sabisiko man•aha. Indide uamangna dingtang kuturirangko porikka sena on•genchimoba, uamang apsan buson re•bagen. NEHU-o poraienggipa chatro chatrirang sapkprakkoba test ka•ja, indide mitam test ka•kugijagipa chadamberang symptoms mesokjagenchimoba, sabisiko man•paani chol donga. Uasan ong•aigija je chadamberangan skanggipa test ka•ao negative ong•achim, uamang gnigipa test-o postive ong•skaa. Chinga hostel-o donggipa pilak chadamberangko Covid test ka•china Department-ni dilgiparangko didiangaha, indiba uamang knachakjaha. Re•anggipa June 20 tariko Management Department-ni manderang “Mosaic” Program-ko ong•ataha, jeon a•palni manderang re•bae bakko ra•angaha. Indake June 21 tarikoba Education Department aro Horticulture Department “Yoga Day”-ko maniangangenba Farewell Program-ko ong•atangjolaha. Ia program-o bang•a chadamberang bakko ra•angaha” ine PGSU-ni President parakataha.
Ia obostarangko nigrike NEHU-o poraienggipa chatro chatrirang aro kam ka•giparangni namgnina chanchie ja•ku de•na nanga ineba PGSU didiangaha.