Resubelpara, July 3, 2022: North Garo Hills a•jani Mendipathar elakkani ning•o donggipa Thapa A•gitchak RMSA Skul Building-ko rikaoni bilsi dok gapengjok, indiba do•ona kingkingba matchotkuja. Maini gimin ia skul nokko da•onaba rika matchotgija galchipe donenga, ma contractor-an togiahama ine songni manderang sing•doangaha. Skul ka•na biap dongjae, songni meeting hall-osa ka•chakenga. Ia meeting hall-o indita bi•sarangko skul ka•na biap chakja, indaken skigipa aro poraienggipa bi•sarang bang•a neng•nikako man•enga ine songni manderang u•iataha.
Ia skul nokni bidingo songtangni MLA aro MDC changsaba nirokata dongja ineba u•iataha. Apsan daken Thapa Darenchi-oni Thapa A•gitchak-ona re•gipa rama namsrangjani a•sel songni manderang salanti bajar anti re•na, Skul, kolege re•rurana aro dingtang dingtang Office-rangchi re•a doanio namen neng•nikaniko man•enga ineba u•iataha.
Ia ramako song dam 10-ni manderang salantian ja•achi re•ruraenga. Uni gimin, ia ramako manderangni namgnina chanchie nirokatpachina songni manderang district administration aro PWD department-ni bil gnanggiparangko mol•molataha.