Tura, September 20, 2022: North Eastern Hill University (NEHU) Tura Campus-ni Post Graduate Students Union (PGSU) Monggolbar attamo NEHU-ni Vice-Chancellor-ko gronge RDAP Farm aro Campus-ni ning•o donggipa ramarangko taridape on•china mol•molangaha.
PGSU-ni janapatani gitade, Tura NEHU Campus ning•o MSC Rural Area of Agricultural Production Department-ni bagan ba farm gita aro Arbella Boys Hostel-oni RDAP Farm-ona re•gipa rama namjani a•sel chatro chatrirang, skie ra•enggipa Department-oni RDAP Farm-ona re•angna NH-51 sorok gita re•rurana nangenga. Ia ramako tarie on•genchimode, chatro chatrirang Farm-ona joljol re•angna gita man•genchim. Iasan ong•aigija ia bagan ba farm-o bosturangko chimonge dongchakani warehouse dongja, uni gimin warehouse-ko rike on•china dabiangaha.
Unbaksana, galchipe donenggipa Greenhouse-ko tarie on•pilgenchimode, chadamberangna jakkaltobegipa ong•genchim.
Uandake RDAP bagan ning•o pokkri aro wak jilchakramkoba da•o galchipe donenga. Ia galchipe donenggipa biaprangko taripile on•na nangchongmota ineba PGSU dabiangaha.
PGSU dilgiparang NEHU Tura Campus-ni ramarang namjani bidingo Vice-Chancellor baksa agan golpogrikengon, PGSU-ni President Te Francist Marak, NEHU lake-ona re•gipa rama namjaha aro ia ramako da•alonaba blacktopping on•kujaenga apsandake, NEHU Guest House-ona re•gipa cholgni ramarang namjani a•sel galchipe dongenga. Playground-ona re•gipa ramaba namjani a•sel poraienggipa chadamberang re•a doanio gital building-oni Horticulture Department-ona re•na rama namjani gimin Department-ni manderang ua ramako re•tokjaengaha. Una agreba Arbella Hostel Junction-oni Highway-ona re•gipa rama namjani gimin manderang re•a doanio neng•nikaniko man•tokenga ine janapataha.
Uni gimin janapatgimin ramarangko chatro chatrirangni namgnina ta•raken taridape on•china PGSU Vice Chancellor-ko mol•molangaha.