Tura, September 20, 2022:Garoland State Movement Committee (GSMC) re•baenggipa October 29 tariko Tura Teteng A•ja kal•chakram biapo dal•a tom•bimonganiko ong•atangen aro ia tom•bimonganio Garoland State-ni bidingo chanchirimaniko dakanggen ine koborna parakataha.
Garoland a•dokko dabianio dingtang dingtang a•dokni dilgiparang jekai Ladakh, Bundelkhand, Vidarbha, Purvanchal, Harit Pradesh, Gorkhaland, Bodoland, Tipraland, Dimasa, Karbi Mithila, Vindhya Pradesh-ni manderang re•bae GSMC-na chakpaaniko on•anggen ineba u•iataha.
GSMC-ni dingtang a•dokna dabidilanio chakpaaniko on•enggipa a•dokrang, National Federation For New States (NFNS)-ni bimango, Garoland a•dokko man•na krenganio dakchakaniko on•pana re•baenga. NFNS-ni President Munish Tamang, Garoland a•dokko dabianio chakpaaniko on•na re•baenga. Indita chel•begipa biaprangoni A•chik jatna ka•sae bakrimpenggipa manderangko chinga GSMC rimchaksona kusi ong•a ine GSMC-ni Co-chairman Balkarin Ch Marak parakataha.
“An•ching A•chik jatba ku•cholsan ong•e ia dakgrikanio jinma baksa bakrime kamrangko ka•angna, jedakode an•ching dingtang a•dokko man•pagen. Uasan ong•aigija, anga dingtangmancha politiks-ni a•bao dilenggipa an•chingni dilgiparang, toromni ba Giljani dilgiparang, NGO-ni dilgiparang aro songni nokni pilak dilgiparangko ia tom•aniona re•bae bakko ra•epachina mol•molatna sika. Garoland a•dokko man•genchimode, an•ching an•tangni niamrangko ja•rike a•dokko sason ka•angna gita man•gen. Uni gimin an•ching A•chik jatrang ku•cholsan ong•e, NFNS baksa bakrime kamrangko ka•enba miksongatangko man•kuna dipet watgalgija kamrangko kaangna” ineba Balkarin Marak sakantiko ku•mongataha.