Tura, Sept 1, 2022:A•chikrangoni saksa senior Political dilgipa aro mingsing minggamako man•gipa Garo-rangni pagipa, Purno A•gitok Sangma a•gilsako dongjahaoba, uni atchiani bilsi 75 gapaniko gisik ra•e, uko mande ra•bee, uni Meghalaya a•dokna aro Salgro Salaram a•dokrangna dangdike on•anggimin kamrangko gisik ra•e nokdangni manderang aro NPP dolni dilgiparang Bristibar salo maniangaha.
PA Sangma A•chikrangoni saksa niksenggipa aro gitchambatsranggipa Politician ong•achim. Ua an•tangni ka•sagipa jik dedrangko, mahari ma•drangko aro dingtang dingtang dolni ka•rimskarangko wate 2016 bilsini March 4 tariko rang•gitik a•gilsakko watangaha. Ua bilsi 69 san ong•engkuachim.
Ia PA Sangma sagini atchiani bilsi 75 gapaniko maniaona a•dokni Skotong Minister Pa Conrad K. Sangma, Health Minister Pa James Pangsang K.Sangma, Tura-ni MP Agitha K. Sangma, Ma Sorajini K.Sangma, ma•drang maharirang, NPP dolni MLA-rang, dilgiparang aro gipin dal•dalgipa Officer-rang dongpae bakko ra•angaha.
“Ua pangnan a•song aro jatko kakket aro bebeo re•dilchina chingko skironga. Ua saksa jatni dilgipa ong•a aro ua saksa niksamsoa gnang jat aro a•songko re•dilgipa ong•e, NPP dolko bikotdilgipa ong•achim. Da•alo ua ching baksa dongjahaoba, uni Meghalaya a•dokna aro India a•songna on•gilaniko pangnaba gualjawa. Baba chinga da•alo nangko gimaatjok!. Na•a da•alo ching baksa dongjaoba nangni dakanggimin kamrangko aro namgipa gunrangko jat aro a•songni manderangba gualja. Chinga nangni dedrang ong•e, nangni niksamsogipa kamrangko jat aro a•songna dangdike on•angna ku•rachakenga aro nangni agananggipa kattarangko pangnan ja•rike kamrangko ka•anggen” ine Pa Conrad Sangma aganangaha.
“National People’s Party (NPP)-ko angni pagipa dingtangmancha a•songni manderangna mikkangchi kamrangko ka•angna miksonganio bikotgipa ong•a. Ua niksamsoa gnang pangnan jatna kamrangko ka•ronga, apsandake pilak kamrangko ka•engon, jatko mikkango donne kamrangko ka•china chingko didironga” ineba Skotong Minnister aganangaha.
Indake da•al salni bako PA Sangma-ni janggi tangmitting salrango chu•sokatanggimin kamrangko gisik ra•e, manianiengon, PA Sangma Foundation aro National People’s Party-ni gita program-ko dal•begipa program-ko Tura Auditoriam-o ong•atangaha.