Shillong, August 31, 2022: Khasi Students Union (KSU), Common University Entrance Test (CUET) porikkako sena sienggipa chadamberangni Examination Centre ba porikka sechakram biap ong•gijako on•aha ine parakataha.
KSU-ni parakatani gitade, CUET porikkako sena sienggipa bang•a chadamberang application form-o Shillong songjinmakosa gapatokaha, indiba admit card man•ani salode uamangko Guwahati songjinmaonasa ga•akataha.
KSU-ni Education Secretary, Raymond Kharjana-ni u•iatani gitade, ‘Advance Examination City ‘ ba ‘Porikka sechakna sienggipa biapko’ ko website-o parakatani somoio bang•bata chadamberangna Shillong-ko mesokaha, indiba admit card man•ani salo Guwahati-osa porikka sena nanggen ine mesokatskaha.
KSU aro gipin dolni dilgiparang ia obostani bidingo Education Secretary, Ambrose Ch Marak baksa agangolpogrikangaha aro iani bidingo ua ta•raken National Test Agency (NTA) baksa agangrikgen ine NGO-rangna ka•dongani kattarangko aganataha.
CUET, Post Graduate (PG) porikkako September 1, 2 aro 3 tariko sena sienggipa manderangna admit card-rangko on•ahani gimin KSU ia obostani bidingo ta•raken ja•ku de•angchina mol•molangaha.