Niksenggittim ramako tarigipa Contractor-ni kosako jegale badi ka•a

0

Tura, December 6, 2022: Garo Hills-ni Social Activist, Flaming B Marak, PWD (Road) Department-ni Chief Engineer-na lekka sedoate, Sorkario Registered ka•gipa Contractor Sanjay Saha-ni kosako badi ka•aha.

“Sing•sandie koborko man•ani gitade, Contractor Sanjay Saha-na Tura songjinmani Niksenggittim ramako tarina gita tender-ko on•aha. Indiba Sanjay Saha ia ramako tariengon, jakkalna nanggipa bosturang jekai rong•terangko aro uandake gipin bosturangko nanga gita jakkalgija tarienga. Saha ramako mangrakatna gita jakkalna nanggipa bosturangko jakkalgija tarienggipa rama dikdiksanasan ong•aigen, baikamgipa ong•jawa ine gittimni manderangni matnangako knasona gita man•aha. Ia ramako namgija tariani bidingo Niksenggittim-ni manderang Social Media-rang gita jekai WhatsApp, Facebook, Instagram-rango video aro photo-rangko ka•e watpripraattokaha, indiba gittimni darangba uni kosako badi ka•gipa dongjani a•sel Department-ni manderang maming ja•ku de•aniko dakjaha. A•songni dongimin niamrangoni mingsa Article 21-o Right To Life gnang, jeon ramarangko miksonga, ramarang namgenchimosa an•ching songsalni gita tang•dodapaniko man•gen. Uni gimin anga saksa Social Activist ong•e, jatni namgnina aro silroro namroroanina kamrangko ka•na miksonga. Niksenggittim ramako tarina gita tender man•gipa Contractor an•tangni namgnina chanchina nangja, PWD Department una songsalko tang•doatna aro nitodapatna tender-ko on•aha. Uni gimin Sanjay Saha-ni kosako Department kraa gita ja•ku de•na nanga aro ramako gital taripiltaie on•china ge•etna nanga” ine Flaming B Marak janapataha.

Leave A Reply

Your email address will not be published.