NIC-ni DDG e-governance project-ko nipiltaia

0

Tura, April 8, 2022: New Delhi-ni NIC, Deputy Director General aro Meghalaya a•dokni NIC Coordinator Rajender Sethi West Garo Hills a•jani e-governance-ni kamrangko ba project-rangko nipilangtaiaha.

Ia tom•aniko Sukrobar salo DRDA Conference Hall-o ong•atangaha aro West Garo Hills a•jani Deputy Commissioner Ram Singh, Meghalaya NIC-ni Deputy Director Timothy Dkhar aro Line Department-ni bang•a Official-rangba bakko ra•angaha.E-governance project-rangko nipiltaiangengon, a•dokni NIC Coordinator Rajender Sethi a•jao e-governance project-ni kam ka•ani bidingo agantalataniko dakangaha aro sorkarini official-rang ia project-ni bidingo uamangni chanchianirangko jinma baksa sualpachina didiangaha.

Timothy Dkhar jinmana aganprakengon, NIC-ko ta•raken Single Sign-On (SSO) System-ko e-service-na oprake on•anggen jean kam ka•enggipa pilaknan ka•donge apps login ka•na gita man•gen aro NIC-ni tarigipa ‘Sandes App’ koba ta•raken oprake on•anggen jedakode message-rangko watanio e-governance-ni dam komigen. Unbaksana Drawing and Disbursing Officer (DDO)-rangnaba e-billing-ko tarie on•anggen. NIC ia bilsini gisepon bang•a App-rangko oprake on•anggen ineba aganangaha.

West Garo Hills a•jani NIC-ni DIO, Sengre M Sangma ia tom•anio NIC-ni bang•a Departmentna e-governance aro e-project-ko tarie on•enga aro a•dokna bang•a nama kamrangko ka•e on•enga ine aganangskaha. Ia tom•anio bang•a official-rang an•tangtangni chanchianirangko aganparake on•angaha.

Leave A Reply

Your email address will not be published.