MBOSE porikkako seenggipa bi•sarangni matnanganina Examination Controller talataniko on•a

Shillong, April 8, 2022: SSLC porikkako seenggipa chatro chatrirang Social Studies ki•tapni porikkao syllabus-ni a•palo donggipa sing•anirangko MBOSE sing•angaha ine matnangaha.

Porikkako segipa chadamberangni matnanganina MBOSE-ni Examination Controller, TR Laloo “Social Studies ki•tapni porikkana sing•anirangko syllabus-o donggipa chapter-rango pangchakesa tariaha. Chinga maming dakeba syllabus-ni a•palo sing•anirangko sing•ja. Re•angggipa bilsi aro ia bilsini sing•anirang rokkom ba question pattern-rang dingtanga, indiba chinga poraienggipa bi•sarang nama mark-rangko man•china chanchie sing•anirang ba question-rangko tariaha. Je bi•sarangan ki•tapko name poraia uamang chingni sing•anirangko aganchakna man•gen” ineba agandapataha.