Shillong, October 6, 2022: East Khasi Hills a•jani sima ariko nitimenggipa Border Security Force (BSF) sipairang Bangladesh a•songona ra•srukanggipa matchu mang 16-ko ra•sekrikna man•aha ine parakataha.
BSF sipairang Monggolbar pringo sima ari gita ra•srukangenggipa matchurangko aro matchu gate ra•angenggipa gariko rim•rikaha.
Meghalaya a•dokni BSF sipairang Mobile Check Posts (MCP)-ko East Khasi Hills aro West Jaintia Hills, East Jaintia Hills a•jani ramarango a•bachengataha. Indake uamang MCP-o donge matchu badinggiparang aro gipin bosturangko niam gri a•song gipinnona badinggipa manderangko raken sandianiko dakenga. MCP-ko donanichi bang•a matchu cha•ugiparangko rim•a man•aha ineba BSF sipairang u•iataha.