Williamnagar, Aug 2, 2022: South West Garo Hills a•jani ramarang gita niam gri rong•terangko salruraani a•sel rama sorokrangko nosto ka•engani gimin Niksamso A•chik Society (NAS) Garo Community Organisation raken jegalataha.
NAS-ni jegalata gitade, jrimbegipa rong•terangko nangana batpile truk garirango gatprete salanichi rama sorokrang nosto ong•aniko nike indakgipa kamko dontongchina mikkrakataha.
Transport Department, niam gri rong•terangko salenggipa truk garirangko maming nirok simsaka dongja, an•tangtangni man•gnina niam gri salruraenggipa rong•te garirangko nie dongenga ine NAS-ni President Tengrak Marak matnangataha.
Je biaprangon jrimako togipa ba check ka•gipa weightbridge-rango nirokna nangachim, indiba nirok simsakgija niam gri kamko ka•enga. Uni gimin weight aro measuring-ko je biapon on•na nanga uno on•gija niam gri kamko ka•enga, indakgipa kamrangko NAS nie dongjawa aro jrimako togipa dollongko tarigija rong•te salgipa truk garirangko watjachina rake champengataha. Transport Department nirok simsakjani gimin uamangni kosako sorkari action ra•na nanga aro driving licence donggijagipa driver-rangko sandie niam gita sasti on•na nanga ineba NAS dabiangaha.
Battanggimin salrango South West Garo Hills a•jao dumper garirang saldape siatgipa manderangna sorkari maming dakchakaniko on•kuja, iano pangchake rong•terangko gipin a•songchina challan ka•aniko dontongchina aro nosto ong•gipa rama sorokrangko taripile on•china NAS dabiangaha.