Tura, August 2, 2022: Anti Naxal Task Force (ANTF) dol, Sombar pringo WGH a•jani Pulis Constable saksa UBC/534 Ajay Chetri-oniko gram 10.53 heroin-ko man•aha. Songbad-na u•iatani gitade, rim•a man•gipa pulis constable Ajay Chetri-ko ta•raken kamoniko suspend ka•aha.
Ajay Chettri, East Khasi Hills a•jani Nongmensong gittimo drugs badingenggipa saksa Philomina Diengdoh-ni depante bilsi 29 ong•gipa Khawbok Diengdoh ua heroin-ko on•atahachim. Apsandake Shillong pulisrang uamang ma•ningsako rim•e sing•sandianiko dakenga ineba u•iataha.
Ia obostani bidingo Shillong-oni Tura-ona re•bagipa Ria Night Busni Driver, Handyman aro garini nokgipakoba sing•sandianiko dakna Pulisrang rimrike donenga. Ua manderanga Tura Upper Babupara-o donggipa DK Nag-ni depante bilsi 57 ong•gipa Arup Nag, Tura Beldarpa-ni Lokeshwar Burman-ni depante bilsi 59 ong•gipa Suresh Burman aro Garobadha, Mukdangra-ni Gopal Dalu-ni depante bilsi 33 ong•gipa Shankar Dalu ong•achim.
Pulisrang uamangoniko mobile phone, SIM Card, bus gari registration no. ML-08E-6111, unbaksana Maruti Suzuki registration no. AS 01 AB 6116 garikoba ra•sekaha ine parakataha.