Tura, Aug 2, 2022: Garoland State Movement Committee (GSMC) HQ, Tura Garoland State-na dabianiko bilakbatatna Asanang-o tom•bimonganiko ong•atangaha. Ia tom•aniko GSMC, HQ-ni Additional General Secretary, Bostone M.Sangma nambee dilangaha.
Indake tom•aniko a•bachengna skang “Ang Songko On•bo” Garo National Anthem-ko jinma ringe Asanang Baptist Mondol-ni Pamongchi Isol-o bi•e tom•aniko a•bachengataha.
Ia GSMC-ni tom•bimonganiona sokbagipa sakantiko Asanang-ni dilgipa saksa Rajendra A. Sangma rimchaksoani kattarangko aganangaha. Tom•bimonganiko an•saoatna Asanang-ni chadamberang, Tra Basania A. Sangma aro uni dol, A•songna ring•mitellaniko ring•e an•saoatangaha.
“Garoland State mikkangchi gipin jatrang baksa apsan ku•mongna nanggenchimoba maming neng•nikani gri ku•mongrimna mangen” ine GSMC Pedaldoba Regional Unit-ni Chairman Rimjen Ch. Sangma aganangaha. Unbaksana GSMC HQ, Tura-ni Spokeperson Ryan Ch. Marak, “Garo-rang dingtang dingtang dolko bikote A•chik A•songko bilakatna dangdikenga, uni gimin an•ching GSMC dolsan jakgitelna krengjaenga, indiba gimikan apsan ku•mongenga, uni gimin hai an•ching bilake re•mikkangna” ine ku•mongrimangaha.
“Garoland State Movement Committee (GSMC)-ni songrea bilsi 10 gapaha, GSMC batangimin salrango dingtang dingtang A•chik A•songni kona noksikbrion tom•bimonganiko ong•ate, Shillong aro New Delhi-ona re•ange changni chang Garoland State-na dabiangaha. Garoland State-na dabianiko A•chik A•song gimikon namniktokani gimin mikkangchi bilakbate dabiangna bang•a dilgiparangko nangenga. Naga manderang, Nagaland State-ko man•genchimoba Nagalim jean dal•batgipa Nagaland-na dakgrikaniko dontongjaenga, uni gimin, India A•songo ru•utbatsrange a•jatangna krengdilgipa dol ong•enga. Mizo manderang state man•ani ja•mano namen tang•doaha, uni gimin education India-o skangipa ong•e IAS-ko changanti nakatate a•songtangko ra•doenga. Assamese manderang ku•siktangko dal•nike ku•tangchin rak•batgipa exam-rangko sena bil man•ani gimin altue Assamese-rang tang•doenga. Garo-rangba mikkangchi jattang aro ku•siktangko tang•doatna krenge Garoland-na re•mikkanggenma ine nang•ko aro angko sing•ani ong•enga. India-ni Ma•ambio Garo-rangna bilko on•aha uko bilake jakkalna man•na gita Garoland State-ko man•na gita bilake re•mikkangna nangenga. Hai gimik A•chik songrangon Garoland State-na ku•monganiko on•na, ong•jaode mikkangchina niksamsoani dongjaode ja•manchakgen” ine GSMC HQ, Tura-ni Co-Chairman Balkarin Ch. Marak, tom•bimonganio ma•talatangaha.
Bon•kame GSMC HQ-ni Assistant General Secretary Cyril A. Sangma mittelpilani kattarangko aganne tom•aniko matchotataha.