NGO-rangni ku•pattianiko sorkari ra•genchimode a•sel ong•aoni naljokgenchim:NGO
Tura, November 23, 2022: Association for Democracy and Empowerment (ADE), Apex Committee HQ Tura, FKJGP Garo Hills Zone, West Jaintia Hills a•jani Mukroh-o ong•a obostako raken jegalataha. ADE aro FKJGP duko ga•akenggipa nokdangni manderangna gisik ka•tong gimikchi kalimpaaniko parakataha.
Bang•a changon, a•dok sorkari Assam sorkari baksa sima arini bidingo bakrime soi ka•na skang mikrakatanirangko on•ahachim.
“Unbaksana chinga nangrimgimin NGO-rang Assam pulisrangni Meghalaya a•doko nape manderangko kragija sinjete aro kal•steke roani bidingo raken jegala. Assam Forest Department-ni manderang a•dokona napbae, Meghalaya a•doko godown-rangko rikna, bagantangniko bolrangko ratna champenga. Assam a•dokni bajaro palgipa matchurangko bree noktangchi ra•bagenchimoba, uamang Anti-Cattle Trafficking Act-o pangchake, Assam a•dokni pattoko manderangko donatronga. Chinga ia obostarangni bidingo bang•a changon sorkari baksa agan golpogrikahachim” ine ADE-ni President Dalseng Bira Ch. Momin parakataha.
Indiba NPP dolchi rikenggipa MDA sorkari aro Skotong Minister Conrad Sangma, “Chingni mikrakataniko maming dakeba ra•jaha. Indakgipa obostarangoni naljokna aro sima ari jolo dongenggipa manderangni tom•tome donganiko rakkina aro chel•chakchina, chanchie chinga sorkarina mikrakataniko on•ahachim. A•dok sorkari NGO-rangni agan ku•pattianiko aro dabianiko knachakgenchimode, indakgipa a•sel ong•jawachim. Conrad Sangma-ni a•dokko re•dilanio Assam a•dokni manderang chu•onggijaniko nike Meghalaya a•dokona napdrae a•dokni manderangko goe galna pa•aha. Assam pulisrangni ka•donganiara a•dokni dilgipana kengijaniko mesoka” ine FKJGP, GHZ-ni President Pritam Arengh janapatskaha.
Maming saloba pulis aro gipin officer-rang gipin jurisdiction-ona napbae, a•dok gipin-ni manderangko rim•na kana aro kal•ake rona man•ja. Biap gipin-ni jurisdiction-ko nirokenggipa pulis officer-na kobor on•atenba, jurisdiction-tangni pulis officer aro gipin officer-rangsa a•jatango ong•a obostako kam ka•na aro rim•na ka•na bil man•a. Indake Assam pulisrangni agrepile bil jakkalaniko a•dok sorkari niroke a•jatangni manderangna chel•chakaniko on•na nanga ineba Pritam Arengh janapataha.
Uni gimin, Assam pulis aro gipin officer-rang jemangan a•sel ong•anio jak dongachim uamangko kamoni ra•galna nangchongmota aro sianggipa nokdangni manderangna kakket bichalko ra•bana nanga ine NGO-rang dabiangaha.