Mukroh-o a•sel ong•anichi duko ga•akenggipa nokdangni manderangko Dr Mukul Sangma grongea
Shillong, November 23, 2022: November 22 tariko West Jaintia Hills a•jani Mukroh songo sak bonga manderangko Assam Pulis aro Assam Forest Guard-rang silai goe so•otahani gimin Opposition ba warachakgipa dol aro Meghalaya Trinamool Congress dolni dilgipa Dr Mukul Sangma a•sel ong•gipa biapona re•ange duko ga•akenggipa nokdangni manderangko grongeaha.
“Da•alo ong•enggipa obostako aro batanggimin somoirango ong•anggimin obostarangko niatgenchimode, iarang pilakan Meghalaya sorkari aro Assam sorkarini SOP-ko ja•rikjani a•sel ong•enga. Batanggimin sorkarini nangrime tarianggimin kamrangko MDA sorkari niatjaha” ine Dr Mukul Sangma kobor ra•timgiparangna aganaha.
“A•dok sorkari sima ari jolo dongenggipa manderangna chel•chakaniko on•a chu•ongjaha. Maini a•sel indakgipa obostarangona sokenga ine Dr Sangma sing•doangaha. Batanggimin bilsirango chinga bang•a neng•nikanirangko chagrongaha. Indakgipa obostarangoni naljokna gita chinga aganchanchirime SOP-rangko ra•gatahachim, jekon da•o ong•enggipa sorkari jakkalna gualaha” ineba ua agandapataha.
Dr Mukul Sangma re•anggipa 2010 bilsio Langpih songo ong•anggipa obostako gisik ra•ate, “2010 bilsio Langpih-oba apsan obosta ong•angaha. Anga ua bilsio a•sel ong•gipa biap aro a•sel ong•anio duko ga•akenggipa nokdangni manderangko grongeaha. Langpih-ni manderang maming chel•chakaniko man•jachim, maina ua biapo 1989 bilsio Meghalaya sorkari Pulis dolko donna jechakaha aro ra•galaha. Ua obosta ong•ani bilsio chinga skanggipa, Assam sorkari baksa agan-golpogrikaha aro Meghalaya a•dokni sima ario dongenggipa songni manderangna maming dakeba sinjetanirangko aro naljokgijanirangko on•na man•jawa ine aganaha. Uandake chinga apsan bilsion, 1989 bilsioni pulis donggijagipa biaprango pulis station-ko donataiaha aro songni manderangna naljokaniko ra•baaha” ine janapataha.
Dr Mukul Sangma Jowai Civil Hospital-ona re•angenba saknae dongenggipa manderangko grongejolaha, unbaksana duko ga•akenggipa nokdangni manderangna ka•dimeani kattarangko aro kalimpaaniko mesokangaha.