Tura, Nov 23, 2022:BJP Tura City District Committee-ni General Secretary Wilver M Danggo-ni November 22 tariko seatgipa kattana Tura-ni gitcham MLA aro MDC John Leslee K.Sangma aganchakatskaha.
John Leslee Sangma-ni aganchakatani gitade, “Anga maming saloba an•tangko BJP-ni candidate ong•e chakatna seokaha ine a•kanga dongkuja. Maina da•odipet BJP party-ni ticket-o chakatna dorgasto on•china u•iata dongkuja. Re•anggipa November 20 tariko angni nokona okamatako man•ne ritchani ritcha manderang meetingona re•batokaha. Meetingni miksongara, Tura songjinmao ma•sina man•gijagipa manderang, John Leslee Sangma-de North Tura-osa chakatna am•enga ine jangbingbangatani gimin, angna kusi ong•chakgiparangna indakede ong•ja, anga South Tura-on chakatgen ine talatna tom•attanisa ong•achim” ine John Leslee K.Sangma janapataha.
“Anga da•odipet name ma•sikuja, anga BJP ticketna dorgasto galgenma, galjawa indiba anga ma•sia angna South Tura-o ka•sagipa aro ango hajal pangchakgipa manderang donga aro anga maming saloba uamangko watgale katna man•jawa. Anga eleksin chakatode, South Tura-on chakatgen, ong•jaode anga chakatsrangjawa inesa chanchirimahachim. Angko BJP-ni active member ong•ja ine jegalani kakket ong•ja, maina BJP-ni chubatgipa gadangni dilgiparang angni nokona mande watate, ru•uta somoionin angko BJP-o rimnapna kamrangko ka•aha aro indake June 29 tariko anga Shillong BJP Office-o State President Ernest Mawrie-ni jakchi BJP MLA AL Hek aro BJP Minister Shanbor Shullai-ni dongpanio BJP party-ona rimnapako man•aha” ineba Sangma talataha.
Party-o napani ja•man salsani gisepon, anga sak 200 mang membor-rangko party-o napataha aro indake adita somoini ja•mano sak hajal 2-rangko membero enroll ka•na form-rangko bi•ahachim, indiba da•alona kingkingba party angna enrollment form-rangna senge dongenga. Chubatgipa gadangni dilgiparang angna kam on•aniara, organisation-ni kamko gale political-ni kamko ka•bo aro na•ade gital gitcham MLA, MDC-rangko party-o rimnapna kam ka•bo ine aganaha aro angade ukon dakengachim. Wilver Danggo-ni angko meetingrangchi re•ja ingipa katta gualani ong•a, maina re•anggipa November 9 tariko MDC Dhormonath Sangma adita manderang baksa BJP party-o napeani salo angaba Wilver baksa meetingo dongpaha ine vedio-rang sakkiko on•gen. BJP dilgiparang sana ticketko on•gen, on•jagen uko BJP-ni Centre Election Committee-sa basena niam gita bil man•a. Haida Wilver an•tangan, “Angaba BJP party-ni membor ong•a, ine South Tura-o chakatna miksonge party ticketna dorgasto galpana miksongenga” ine English-chi seako ma•sisretahakon. Uni kattarangko name nichenggija seaniara angna chakgipa South Tura-ni manderangna angni dangdike on•na sikanikode maming dakeba rongdimelatjawa, indiba ian manderangni nikanio BJP Meghalaya State President-ni chokkiko namen ong•siataha aro mikkangchi party-na kam ka•na sike napbagiparangna namen jajabeani ong•aha ine John Leslee Sangma janapatskaha.