NGO-rang Upper Bamunigaon songni gue baganrangko nosto ka•e galani bidingo tom•e chanchirima  

Kamrup, Jan 24, 2023:Re•anggipa Bristibar pringo Assam Forest guard-rang, Kamrup district-ni ning•o donggipa Upper Bamunigaon songni A•chikrangko a•rikgalna miksonge bang•a baganni guerangko den•ne galahani gimin NGO-rang aro aongni manderang Sombar salo tom•e chanchirimaniko dakaha ine kobor man•aha.

Assam Forest Department, skatang songni manderangna maming u•iata gri baganni guerangko nosto ka•e galani bidingo tom•e chanchirimanio Rabha Hasong Autonomous Council (RHAC)-ni EC Nagarmall Swargeyary, EC Fryline R.Marak, GSU Assam State Zone-ni President Foldin Marak, GSU Kamrup District-ni President Mactradale Sangma, Assam Jatia Parishad-ni President Raksim Marak, ARSU Gamerimura Anchalik-ni Ppresident Bikan Rabha, SSDC Gameeimura Anchalik-ni dilgiparang aro songni manderang dongpae bakko ra•angaha.

NGO-rangni tom•e chanchirimanio Forest Department-ni ong•gija dake baganni guerangko nosto ka•e galani bidingo Assam sorkarina lekka sedoatan baksa jingjengatanirangko dakna jinma ku•mongangaha ine koborna u•iataha.

Indiba jingjengatani ba dharna ka•ani sal aro somoirangko parakatkuja, Assam sorkarina lekka sedoatani ja•manosa NGO-rang apsan bakrime jingjengataniko dakanggen ine u•iataha.

Kamrup district-ni Upper Bamunigaon songo songdongenggipa A•chikrang an•tangtangni a•arango bagan bari dake janggi tanggiparang ong•achim, indiba Assam forest guard-rang uamangni bagano ge•gipa bang•a guerangko nosto ka•e galani a•sel songni manderangna dal•bea gimaani ong•aha.