Tura, January 24, 2023: Garoland State Movement Committee (GSMC) Gimbil Agal Sub Unit-ni General Secretary Raseng Sangma, West Garo Hills a•jani Deputy Commissioner-na lekka sedoate, sorkari skulni saksa skigipa ong•e, NGO dilgipani kamko ka•enga ine parakataha.
GSMC dilgipani parakata gitade, Chibinang “Chandigre ME Skulni Headmaster, Brinal Marak NGO baksa bakrime kamrangko ka•enga. Ua GSMC Phulbari Regional Unit-ni President ong•e kamko ka•enga. Ua saksa sorkari skulni skigipa ong•e, NGO dilgipa ong•aniara kragijani ong•a. Ua an•tangni NGO dilgipa ong•aniko donnuenga. Ua Monggolbar sal changanti Chibinang bajaro tangka gile, an•tangni namgnina jakkalenga aro GSMC-ko namgija bimingona ra•baenga. Ian a•songni dongimin niam gita, All India Service Rules Act, 1964 Rule 15 (2)-ko pe•ani ong•a” ine Raseng Sangma janapataha.
Uni gimin, ua skigipani kosako ta•raken sandianiko dakchina GSMC dilgipa DC-ko mol•molataha.