NGO-rang soi ka•gimin MoU-ko jegale jinma re•joma, MoU-ko nipiltaichina dabia
Tura, April 22, 2022: Garo Hills-ni nangrimgimin dingtang dingtang NGO-rang jekai ADE, FKJGP, AYWO, FAF, NTDF TGSCF aro gipin NGO-rang, Social Organisation-rang a•dokni Skotong Minister Conrad Sangma aro Assam-ni skotong minister Himanta Biswa Sarma-ni soi ka•gimin Memorandum of Understanding (MoU)-ko jegale Tura-o dal•begipa tom•bimonganiko Sukrobar salo ong•atanga baksana namnikgijaniko mesokna jinma re•jomaniko ong•atangjolaha.Meghalaya a•dokni sima ario donggipa adita songrang aro a•arangko Assam a•dokchi pakwatatna re•anggipa March 29 tariko Meghalaya aro Assam a•dokni Skotong Minister sakgni MoU-o soi ka•aniara Meghalaya a•dokni sima ari jolo songdongenggipa manderangni ra•chakna amgijani ong•achim. Conrad Sangma-ni MoU-ko soi ka•e, Meghalaya a•doko skangoni songdong a•chaenggipa manderangko gipin a•dokna watbrangataniara dal•bea gualani ong•a ine NGO-rang jegalangtokaha.Da•o je songrangkon Assam-chi pakwatengachim, ua songrango songdonggipa manderang 1972 bilsionin Meghalaya a•doko songdong a•chae Meghalaya sorkarini on•enggipa pilak namgnirangko man•a baksana Meghalaya a•dokni eleksin identity card-rangko man•ne eleksin-rango vote pu•onna man•giparang ong•achim.
Indake Conrad Sangma-ni ong•gija chanchie, an•tangni sika gita a•dok chigani nokgipa aro nirok simsakgipa Sordarshiprang, Shyiemshiprang, songo noko songdong a•chaenggipa manderango mamingkoba sing•chenggija aro KHADC-ni maming raiko man•gija Assam a•dokna pakwatataniara an•tangni political dolna chanchie kam ka•anisan ong•aia, uni gimin MoU-ko nipiltaichina NGO-rang dabiangaha.
“Chinga Meghalaya-ni a•ako jaksisaba Assam-na on•jawa, ia MoU-ko nipiltaikuja dipetna chinga dakgrikanggen. Je biapo dongoba A•chikde A•chikan aro A•chikni an•chian ong•a. Chinga A•chik jat ong•e, jattangni duk mikchi ong•aniko nike namen duk ong•a aro uamangna dakgrikpana an•tangtangko on•kanga. Na•a Meghalaya-ni skotong minister ong•oba, a•ani nokgipa ong•ja aro maming dakeba a•dok chigako pale cha•na man•ja. Sixth Schedule-ni a•arangko sorkari maming dakeba a•kangna man•ja aro a•ani nokgipa ong•ja, sorkaride a•dokko nirok simsake chel•chakgipasa ong•aia” ine NGO-rang parakataha.
Ia dal•begipa tom•bimonganio duko ga•akenggipa songni manderang aro Garo Hills-ni bang•a manderang re•bae bakko ra•angtokaha. Indake tom•a matchotani joljol, New Tura Law Kolege kal•chakram biaponi Dakkopgre-o donggipa, Mini Secretariat office ba Chief Minister-ni office-ona jinma re•jomange India a•songni Home Minister Amit Shah-na Skotong Minister Conrad Sangma-ni jak gita Memorandum-ko on•angjolaha.