Shillong, April 22, 2022: Meghalaya a•dokni Education Department aro Nort Eastern Hill University (NEHU)-ni skigiparang jinma apsan ku•monge Sukrobar salo CUET-ni bidingo chanchirimaniko dakangaha.Ia tom•anio NEHU-ni Vice-Chancellor aro lecturer-rang bakko ra•angtokaha.
“Chinga sorkarini gita CUET porikkako ong•atna bijolini tik ong•gijani aro internet connection bilgriani a•selo bang•a neng•nikanirangko man•a. CUET computer based test ong•a aro iako ong•atna gita an•chingni a•doko chu•onga gita infrastructure-rang dongkuja.NTA Department-ni u•iatani gitade, Meghalaya a•dokni Shillong aro Ri-bhoi a•jaosan CUET-ni porikkako seani centreko donataha. Ian chingna rakbegipa kam ong•ani gimin chinga, Additional Chief Secretary-ko Delhi-ona watataha aro ua Bristibar salo NTA baksa tom•bimonganio bakko ra•e Meghalaya a•dokni pilak a•jarangon porikka seani centre-rangko donatna nanga ine aganangaha.Central University-o admission man•na dakgni kamrangko chatro chatri pilakan skulni Principal-rang agantalate on•angna nanga” ine Education Minister Lakhmen Rymbui aganangaha.