Resubelpara, April 23, 2022: Klas 12 porikkako matchote Central University-ni kolege-rango BA, BCOM, BSC-na admission man•na gita UGC-ni dongimin niamo pangchake Central University Entrance Test (CUET)-ko setelna nanga. CUET ian computer-osa porikkakon sena nanggen. Uni gimin, Meghalaya a•doko CUET porikkako seatna chu•onga gita bosturang, jekai bijolini tik ong•gijanirang, aro bilakgipa internet connection dongja, iani a•selo bang•a neng•nikanirangko man•soenga ine Rongrong-ni MDC Rinaldo K.Sangma janapataha.
“CUET porikkako sena gita donatgipa centre-rang jekai Shillong, Ri-Bhoi aro Tura, sak hajalni hajal chatro chatrirang sakprakna computer-o porikka sechakna on•na gita chu•onge dongja. Indake ong•genchimode, chadamberang maikai porikkako segen. Mitam kangal cholgri ong•e poraienggiparang ia porikkako sena gita re•na dona aro dongchakna tuchakna tangka paisarang dongjagenchimode, maikai porikkako segen. Uasan ong•aigija mitam chadamberang computer-ko jakkalna changjagenchimode, uamang maikai porikkako segen” ineba MDC sing•doataha.
Uni gimin, “anga dilgiparangko mol•molna sika, an•ching Meghalaya a•dokba University-ko bikotelna nangchongmotengaha. Assam a•doko a•doktangni ge•gni University donga, Assam Down Town University aro Assam Don Bosco University. Ia ge•gni University-rangan, UGC Act, 1956-o segatako man•aha aro Assam a•dokni pilak kolege-rangan ia ge•gni University-osa kolege tangtangko register ka•tokaha. Meghalaya a•dokni ge 9 University-rang UGC-ni nikanio donga, indiba uarang segatako man•kuja. Indiba Meghalaya a•dokni pilak kolege-rangan NEHU-osa register ka•toka aro darang kolege-ba ia Private University-rango register ka•a dongja. Meghalaya a•dok sorkari ia private University-rangko jako ra•e, UGC Act-o segatatako man•genchimode, uamangni indakgipa nama ja•ku ga•aniko darangba gualjawahachim ine Rinaldo Sangma janapataha.