Tura, August 24, 2022: Garo Hills-o bijoli ching•a tik ong•gija salo chang channa ampilgija ching•a aro kimita dake neng•nikatengani gimin Garo Students’ Union (GSU) CEC Tura, GSMC aro gipin NGO-rang re•anggipa August 11 aro 12 tarikrango salgni joljol Garo Hills gimiko MeEC office-ko picketing ka•angaha. Apsandake Williamnagar NGO-rang iani bidingo changni chang jingjengatanirangko dakangaha. Indiba da•alona kingking a•dok sorkari maming aganchakaniko on•jaengani gimin, August 24 tarikoni 26 tarikona Garo Hills gimiko MeECL office-ko picketing ka•na a•bachengattaiaha.
Indake GSU-CEC baksa gipin NGO-rang apsan ku•monge salgittamna MeECL office-ko picketing ka•angtaigen, uni gisepon sorkari maming aganchakaniko on•taija ong•ode, August 29 tarikoni September 3 tariona walo rama champengataniko wal 9 bajioni pring 5 bajiona Garo Hills gimiko ong•atangskagen ine GSU-CEC-ni President Zikku Balgra N.Marak parakataha.
Da•al August 24 tariko MeECL office-ko picketing a•bachengatengon, Garo Hills-ni dingtang dingtang biaprang jekai Tura, Williamnagar, Mendipathar, Phulbari jolrango jingjengataniko a•bachengataha.
GSU-CEC aro gipin NGO-rangni MeECL office-ko picketing ka•ani miksongara, Garo Hills-o bijoli tik ong•e watjaengani gimin manderang aro poraienggipa chatro chatrirang inditan neng•nikaniko man•enga. Garo Hills-ni dingtang dingtang Skul aro kolege-rango poraienggipa chatro chatrirang aro dingtang dingtang porikkarangko sena tarisoenggipa chatro chatrirang gisiko nange poraimittingo bijoli ching•a, kimita dakani a•sel chatro chatrirangni gisiko bringbrangata.
Uni gimin Garo Hills-o bijoliko tik ong•e watchina, department-o kam ka•giparangko chu•onga gita kamo rakkichina, Khasi Hills-o kamna advertise ka•ode, Garo Hills-oba apsan advertise ka•e, kamna seokchina dabiengachim. Maina batanggimin salrango Khasi Hills-osan MeECL department-ni kamna advertise ka•e, Khasi Hills-o kam ka•giparangko seokangaha. Indiba Garo Hills-o kamna advertise ka•a dongjachim, indake mikkang nitee kamna seokaniko jegale apsan Job Reservation Policy-ko ja•rike, Khasi aro Jaintia-na 40% Garorangna 40% ko apsangrik kamo rakkiangchina NGO-rang dabiangaha. Unbaksana batanggimin somoio Junior Engineer-ni kamna sak 52 Khasi-rangko rakkiaha, A•chikrangko saksaba kamo rakkijaha ineba parakataha.
Indake ong•engon, ia dabianirangko knachakja ong•ode, jingjengataniko dontongjawa, mikkangchi rakbata ja•kurangko de•e jingjengatanirangko dakangkugen ine GSU dilgipa parakataha.