Tura, Aug 12, 2022: GSU-CEC aro gipin NGO-rang apsan bakrime, Garo Hills gimiko MeECL Office-ko salgni Picketing ka•na manchisogimin gita Bristibar salo Office Picketing-ko a•bachengataha.
Indake office picketing-ko a•bachengatani salo MeECL department-ni Officer-rang jingjengatenggipa GSU-CEC aro gipin NGO dilgiparangko okgame, agan golgrikaniko dakenba ia dabianirangko a•dok sorkarina aro power minister-na lekka sedoatahachim, indiba sorkari iani bidingo maming ka•dongataniko on•kuja ine aganataha.
Uni ja•mano West Garo Hills a•jani Deputy Commissioner salni 2 bajimango NGO dilgiparangko okame NGO-rangni dabianirangko sing•aha. NGO-rang Garo Hills-o bijoli tik ong•gija dikdikprakon ching•a kimita dakani gimin, department-o kam ka•giparangko chu•onga gita kamo rakkichina aro GH-na namgipa bijoliko on•china, Khasi Hills a•jaosan kam ka•giparangko seokaigija, GH-oba kam ka•giparangko seokchina dabiengachim. Indiba ia dabianirangko sorkari knachakja ine NGO-rang DC-na aganaha.
DC, NGO-rangni dabianiko man•a dipet department-ni Officer-rang aro Power Miniater baksa agangrike kamko ka•gen, indiba ia kamrangko ta•rake chu•sokatna somoi nanggen, maina dingtang dingtang kamrang bang•en gnang, uni gimin sengbo aro na•simangni jingjengatako dontongbo ine aganaha.
Indiba NGO-rang salgni joljol office picketing ka•na tik ka•manahani gimin, sorkari maming ka•dongataniko on•kuja dipet salgni matchote picketing ka•anggen. Uni gisepon sorkari mamingkoba aganchakja ong•ode, August 15-ni ja•man jingjengataniko dakangkugen aro mikkangchi ra•bata ja•kurangko de•anggen ine NGO-rang DC-na aganchakskaha.
Maina bijoli tik ong•gija dikdikprakon ching•a kimita dakani a•sel poraienggipa chatro chatrirangni gisiko nangbee poraimitting somoio bijoli ching•a, kimita dakode, chatro chatrirangni gisikko bringbrangate neng•nikaniko on•a.
Da•o digitalni chasongo chadamberang dingtang dingtang porikkarangko sesusaanio indakgipa obostarangko chagrongani a•selo A•chik chadamberang pangnan ja•manchakaniko man•enga. Uni gimin, indakgipa susaanirango susapana Garo Hills-o namgipa bijoliko on•china NGO-rang MDA sorkariko mol•molataha.