NGO-rang August 29-oni September 3 tarikona rama champenganiko a•bachengata  

Tura, Aug 29, 2022:Garo Students’ Union (GSU) Centre Executive Committee (CEC) Tura, GSMC aro gipin NGO-rang apsan bakrime skanggipa re•anggipa August 11 aro 12 tariko aro August 24,25,26 tarikrango Garo Hills gimik MeECL Office-ko picketing ka•e jingjengataniko ong•atangahaoba a•dok sorkari aro department-ni high level authority-rang maming aganchakaniko on•jani gimin, gittamgipa phase-ko a•bachengate, August 29 tarikoni September 3 tarikona walo rama champenganiko a•bachengatskaha.

Indake August 29 tarikdipet wal 9 bajioni September 3 tarik pring 5 bajiona Garo Hills gimik walo rama champengataniko a•bachengatskagen ine parakataha.

Batanggimin salrango GSU-CEC aro gipin NGO-rang changni chang a•sok sorkarina aro department-ni authority-rangna lekkarangko seate, Garo Hills-o bijoli ching•a kimita dake tik ong•jaemgani gimin tik ong•e bijoliko watchina, department-o kam ka•giparangko chu•onga gita kamo rakkichina, Khasi Hills-o kamna advertise ka•ode, apsandake Garo Hills-oba kamna seokaniko dakchina dabiengachim. Indiba NGO-rangni dabianirangko a•dok sorkari knachakjaengani gimin, gittamgipa phase-o rama champengataniko dakengon, sorkari maming aganchakaniko on•jaode, mikkangchi rakbata ja•kurangko ga•e, dontonggija jingjengataniko dakangkugen ine GSU-CEC-ni President Zikku Balgra N.Marak parakataha.