AOSW, Rongrong Deficit Skulo Assistant Teacher-ni kamna advertise ka•china didia
Williamnagar, August 29, 2022: A•chik Organization for Social Welfare (AOSW), East Garo Hills a•jani Sub Divisonal Skul Education (SDSEO)-na lekka sedoatenba Rongrong Union Deficit UP Skulna Assistant Teacher-ni kamko advertise ka•taichina mol•molangaha.
“Rongrong Union Deficit UP Skulni Head Master February 24 tariko assistant teacher-ni kamna advertise ka•ataha. Indake ong•engon, ia kamna sak 13 candidate-rang galaha aro sak 9 candidate-rang interview ra•na gita seokako man•aha. Indiba uamang MTET pass ka•gimin candidate-rangko skigipani kamna seokgija, MTET pass ka•gijagipa mandekosa kamna seokskaha. Advertisement-o janapatani gitade, application form-ko submit ka•ani bon•kamgipa salara March 11 tarik ong•achim, indake March 16 tariko interview-ko ra•gen ine parakataha. Unbaksana joltangni candidate-na skanggipa cholko on•gen ineba janapa gnang. Indiba joltangni candidate jean MTET pass ka•e dongengachim, uko jegalple MTET pass ka•kugijagipa mandekosa kamo rakkiaha. Kamo rakkiako man•gipa mande May 2 tarikosa D.El.Ed-ko pass ka•aha aro marksheet-ko May 21 tarikosa man•aha. Indiba interview ra•ani ru•uta ja•mansa kamo rakkiaha, ian ra•chakna man•gijani ong•a. Authority-rangni seokako man•gipa mandeoniko tangka man•ne, qualify ong•gipa candidate-ko gale, qualify ong•gijagipa candidate-ko seokaha” ine AOSW-ni General Secretary Premiar N Sangma parakataha.
Uasan ong•aigija Garo Hills-ni bang•a skulrangon chu•onga gita skigiparang dongja, jeni a•selan bi•sarangna dal•bea gimaani ong•a. Da•ororoni chasongo poraia skia dal•genchimoba tangka paisa on•na man•jaode kamko man•rongja.
Uni gimin indakgipa kamrangko ka•na nangchongmotja aro authority-ni manderang kamko tangkachi brena re•baenggipa manderangko jegalsona nangchongmota. Kangal cholgri manderang poraia matchote rogenchimoba uamang tangka paisa on•na man•jani a•sel kamgri dongenga. Uni gimin kamko tangkachi breaniko dontongna nangchongmota ineba ua janapaha.
AOSW, Rongrong Deficit UP Skulo skigipani kamna advertise kataina nanga aro qualified ong•gipa mandekosa kamo rakkina nanga ine dabiangaha.