Tura, May 25, 2022: Garo Hills-ni NGO-rang jekai ADE, FAF, FKGJP aro AYWO Monggolbar salo a•dokni Skotong Minister-na lekka sedoatenba soi ka•gimin MoU-ni bidingo janapataiaha.
NGO-rangni janapatani gitade, soi ka•gimin MoU-o seani gitade West Khasi Hills aro Ri-Bhoi a•jani bang•a A•chik songrangko Assam a•dokna pakwataha.
Indake ong•enggon West Khasi Hills a•jao donggipa Mallangkona song jean, Hima Nonglang-ni ning•o ga•akachim, ua songona Assam pulisrang re•bae biltangko mesokna jotton ka•enga. Uni a•sel songni manderang aro Assam pulisrang pangnan kajia golmal ong•aniona sokenga. May 23 tariko song dam 3-ni manderangko Assam a•dokni All Rabha Students’ Union (ARSU) dolrang re•bae ka•mikkenataniko NGO-rang raken jegalataha.
“Mallang Salbari songni manderang Mallang Salbari LP. Skul aro Mallang Salbari Baptist Mondoli-ni dingtang dingtang bosturangko chimonge donna gita nok rikenggipa biapona Assam pulisrang Sombar salni pring 10 bajimango re•bae nok rikenggipa manderangko ka•mikkenate kamrangko dontongchina ge•etaha.
Ministry of Home Affairs-ni mikkango soi ka•gimin MoU-ni bon•kamgipa chanchianiona re•bakujaenga, uni gimin pakwatgimin a•arang Assam a•dokona ga•akujaenga. Uni gisepon Assam pulisrang maming dakeba Mallang Salbari songona napbae, songni manderangko ka•mikkenatna bil dongja” ine NGO dilgiparang jegalataha.
Ua apsan salon, Assam pulisrang Jeep bol 3-o chu peke Mallangkona Garojan songona re•bae songni sak 3 me•chikmarang aro sak 6 me•asarangko doke saknaataha. Koborko knasoani gitade, Assam pulisrang manderangni badi ka•aniko man•soe Garojan songona re•angaha. Unon uamang a•palo kam ka•enggipa me•chikma saksani “gitchima” ra•bite re•baako niksoe, uko dos dakgipa ine chanchie dokna a•bachengaha.
Indake dos gri me•chikmako skatang Assam pulisrangni dokaniko nike jokatna re•bagipa manderangkoba ua me•chikma baksa bak donga ine potchipe dokaha. Chu pekjagenchimode, Jeep bol 3-o re•bagipa pulisrang maikai maming dos grigipa me•chikmani “gitchima” ra•bitako sing•chenggija dokna nanga. Ian Assam pulisrangni dal•a gualani ong•chongmota ineba NGO-rang janapataha.
Apsan daken, All Rabha Students’ Union (ARSU) dolba Mallangkona songni manderangko ka•mikkenatna a•bachengaha. Mallangkona songni manderang Meghalaya a•dokona re•gipa rama namjani a•sel aro chel•batani gimin salantio nanganiko koros ka•na gita Assam a•dokni bajar antiko cha•rongbata. Unbaksana Assam pulis aro ARSU, Mallangkona songni Solendro Sangma aro uni depante Ranbel Marak, uamang paningsa Duphdura bajaroniko hajar 90-na bregimin matchu mang 5-ko noktangona moangna on•gija champengrikaha. Indake nokdangni manderangna uamang paningsa sakgnini gimin maming kobor on•gija rim•e rakkirikaha.
ARSU uamang nokdangni manderangna maming kobor on•ata gri uamangko rim•e ra•rikgenchimode, ARSU-ni kosako IPC Section 32-o pangchake badi ka•na gita man•gen. Uandake Assam pulisrang uamangko rim•e rakkiani kanta 24-ni gisepo nokni manderangna kobor on•jagenchimode, Supreme Court-ni DK Basu Guideline-ko pe•a gita ong•a aro uano pangchake badi ka•na gitaba man•a” ine NGO dilgiparang agan janapataha.
Indake ong•anggimin obostarangni bidingo namedake niatgenchimode, Assam pulisrang, Assam a•dok baksa chaprimna jechakgipa songni manderangko ka•mikennate aro kal•steke rona jotton ka•enga.
“Meghalaya a•dokni Skotong Minister Conrad Sangma MoU-ko nipiltaijawaha ine ku•mitchetaha. Iako pilakan u•itoka. Indiba ua ku•mitchetatango rim•kepe dongaigenchimode, songni manderang uni kamna dikdiksani gisepon aganchakskagen. Gimik manderangan an•tangni gam jinna simsaktoka aro gipinna pakwate on•na sikja. Indide Skotong Minister-ara maikai an•tangni gam jinna simsakgija sakgipinna indin pakwate on•atskaaha. Chinga Skotong Minister Conrad Sangma-ko mol•molatna sika, May 23 tariko Mallangkona songo ong•anggimin obostarangni bidingo sing•sandina nanga aro dos dakgipa manderangko kraa gita sasti on•na nanga. Mallang Salbari songni manderangko Salbari LP. Skul aro Baptist Mondoli-ni Godown-ko rikna gita on•na nanga, maina ua a•ade uamangni tangka paisachi see jote bregimin a•asa ong•a. Minggipin Garojan songni doka man•gipa manderangna Meghalaya Pulis Platoon-ko uamangko chel•chakna aro naljokanina watatna nanga. Uasan ong•aigija Solendro Sangma aro uni depante Randel Marak-ko bano rim•e donenga ta•rake sing•sandianiko dake uamang paningsako maming saknaata gri noktangona naljoke sokangatna nanga, una agreba ARSU aro Assam pulisni kosako badi ka•na nanga” ine NGO-rang dabiangaha.