Tura, May 25, 2022: A•chik Youth Welfare Organization (AYWO), CGB Tura, Meghalaya New Reneuable Energy Development Agency (MNREDA)-ni Project Officer, Jawairya Islam-ko kamoni ra•galchina dabiangaha.
“Chinga FKJGP-Garo Hills Zone-ni dabianio bakrimpae MNREDA Project Officer Jawairya Islam-ko kam ra•galna nangchongmota ine MNREDA-ni Director-na u•iataniko dakaha.
Uni poraiani bida Project Officer-ni kamko ka•na kraja. MNREDA Department-o Project Officer-ni kamo Electrical Engineering-ko poraie passed ka•gipa mandesa ong•na nanga, indiba Jawairya Islam-de Guwahati University-o BA Sociology-kosan poraie passed ka•aha. Department-ni manderang ia kamni bidingo office-ni notice board-o, media-o, songbad-rango maming advertisement-ko on•a dongja aro poraiani bida chu•onggijagipa gipin jatkosa kamo rakkiaha. A•chik a•songo poraia skia matchote kam sandie dongenggipa A•chik chadamberang bang•en gnang, indiba MNREDA Department-de gipin jatkosa kamo rakkiskaaha” ine AYWO matnangataha.
AYWO-ni Education Secretary Changkey Marak-ni parakatani gitade, MNREDA Department-ni manderang Jawairya Islam-ko Assistant Director-ni demechik ong•ani giminsa kamo rakkiaha. Ua Guwahati University-o BA Sociology-ko mangmangsan passed ka•aha, indide ua maikai Project Officer-ni kamko ka•na gita man•gen. Ua gipin jat ong•e, A•chikku-ko poraina aro agana man•gipa ong•ja. Indide ua kamni bidingo Garo Hills gimikchi re•rroroe maikai A•chikrang baksa A•chik-ku•chi agangrikna man•gen. Uni gimin Jawairya Islam-ko kamo rakkianiara kragijani ong•a aro niamni kosako re•aha ine jegalataha.
“Chinga FKJGP dol baksa uamangni dabianio bakrimpaa aro Jawairya Islam-ko ta•rake kam ra•galna nangchongmota ong•jaode, chinga jingjengatanirangko dakanggen ineba Changkey Marak parakataha.