Tura, May 4, 2022: Re•anggipa April 11 tariko Bus Operator-ni membor-rang, Superentindent of Pulis (SP), District Transport Officer (DTO)-rang, Meghalaya Transport Corporation (MTC) Ltd-ni Officer-rang aro WGH a•jani Deputy Commissioner apsan ku•monge Chasingre-o donggipa Inter State Bus Terminus (ISBT)-ko name chalaina chanchirimaniko dakagaha.
WGH a•jani Deputy Commisioner Ram Singh, gipin a•jarangoni ba biaprangoni re•baenggipa busrangko Chasingre ISBT-o donchina ge•etaniko on•angaha.Indioba bang•a bus garirang ge•etaniko manigija da•ona kingkingba PWD ramarango donengkua aro salantio re•na dona nanggiparang traffic jam ong•ate bang•a neng•anikarangko ra•baa. Iani gimin pilak bus salgiparang Supreme Court-ni on•gimin raiko ja•rikna nanga aro manderangni salantio neng•nikanirangko nigrike busko Chasingre ISBT-o donna nanga ine DC u•iataha.
Uandake District Transport Officer aro WGH a•jani Bus Association-ni President aro Secretary, bus nokgiparangko ISBT Chasingre-o busrangko a•jaona sokbahaon donchina ge•etaniko on•china didiataha.