Williamnagar, Sept 23, 2022: Niksamso Garo Community Organisation (NGCO), HQ Simsanggre Garo Hills-ni dingtang dingtang bajar antirango niam gri sorkarini maming permission aro licence gri skatang sam palanirangko raken jegalataha.
Gipin jatrang maming licence gri Garo Hills-ni bang•a bajar antirango skatang samrangko palna sorkari permission-ko on•engama ine NGCO-ni President Tengrak Marak sing•doangaha.
Garo Hills-nj bajar antirango skatang nokkoli samrangko palengama ma asol samrangko palenga, iarangko nirok sandina Medical department-ni kam ong•a. Indiba Medical department niam gri sam palgiparangko nirok sandia dongja ine NGCO janapataha.
Uni gimin niam gri skatang bajar antirangona re•roroe sam palanirangko dontongatchina medical department-ko NGCO didiataha.
Bang•bata songni manderangan skia poraia dongpajani gimin nosto ong•gimin samrangko ma•sija. Uni gimin niam gri sam palenggiparangni kosako raka ja•kuko de•e niam gita sastiko on•na nanga ineba NGCO dabiangaha.
Indake ong•engon, Sonibar salni pilak bajar antirango skatang maming permission gri sam palanirangko NGCO champengataha. NGCO-ni u•iatani gitade
Raksamgre, Pedaldoba aro gipin jolrango niam gri sam palaniko pharmacy dakgiparang palna on•enga ineba u•iataha.
Uni gimin songni manderang skatang palgipa samrangko bree jakkalna nangja ine janapatenba, pharmacy-rangonikosa samrangko bree jakkalna nanga ine didiataha.
Bang•a niam gri skatang tol•e sam badinggipa manderang maming skia poraia gri aro medical department-ni permission gri an•tangtangni man•gnina samrangko palenga ineba NGCO janapataha.