Shillong, Sept 23, 2022: Meghalaya Trinamool Congress (TMC), MLA George B Lyngdoh Bristibar salo Meghalaya People Social Organization (MPSO), Garo Students Union (GSU) aro Ri Bhoi Youth Organisation (RBYO) dol apsan nangrime, a•doko Casino aro Meghalaya Gaming Act-ko ra•gatna miksonganiko jegale jingjengatanio bakko ra•angpaaha.
“Meghalaya Gaming Act-ni ning•o minggittam bakrang gnang uaranga, casino-ko legalise ka•ani, online gambling ba joa kal•ani, cricket, football ba uandakgipa kal•susaanirangko online bet ka•anirang ong•a. Chinga casino-kosan ong•aija, indiba Gaming Act-ko ra•galchina dabianiko dakenga. Online Betting aro Online Gambling a•dokni chadamberangna dal•a gimaaniko ra•bagen. A•dokni pilak chadamberang jakon Mobile Phone donga, jeni a•sel uamang Online Gambling aro Betting-o Casino-chi re•anggijaba bakko ra•na gita man•gen. 2021-22 bilsini gisepo a•dokni Per Capita Income (PCI) 1.8 percent tang•onaha. PCI-ni tang•onanian a•doko bang•a kam gri roenggipa manderangni bang•aniko mesoka” ine Lyngdoh kobor ra•timgiparangna aganaha.
Byrnihat-o bang•a manderang Casino aro Meghalaya Gaming Act-ko jegale, Skotong Minister Conrad Sangma, Dakchakgipa Skotong Minister Preston Tynsong aro Cabinet Minister James Pangsang K Sangma-ni bimangko tarienba so•e galangaha ineba parakataha.