Tura, Sept 23, 2022: West Garo Hills a•jani Gambegre blockni ning•o donggipa ramarang namsrangjahani gimin dabie segipa lekkako Gambegre Area Development Society (GADS)-ni dilgiparang Sukrobar pringo Meghalaya a•dokni Skotong Minister Pa Conrad K.Sangma-ko uni dongchakenggipa nok Tura Walbakgre-o gronge on•eaha.
GADS-ni dilgiparang Skotong Minister-ko gronge, Gambegre Block-ni ning•o donggipa ramarangko ta•rakale tarie on•china mol•molangaha.
Skotong Minister GADS-ni mol•molanina, ta•raken ua ramarangko kam a•bachengatgen ine ku•rachakataha.
GADS-ni Chairman Benjamin Marak-ni u•iatani gitade, Gambegre block-ni ning•o donggipa ramaranga Purakhasia-oni A•dugre gita Tura-ona re•gipa mongsonggipa PWD rama, Darenggre-oni Bolsrem-ona re•gipa, Gambegre-oni Mellim-ona re•gipa ramarang namsrangjani gimin dabie segipa Memorandum-ko Skotong Minister-na on•angaha.
Uni gimin Gambegre jolo songdongenggipa manderang pilakan mikkangchi GADS-ni kamrango apsan ku•monge bakrimaniko on•china GADS-ni Chairman manderangko didiangjolaha.