Tura, Jan 13, 2023: Garoland State Movement Committee (GSMC) January 12 tarik Bristibar salo Tura songjinmao tom•aniko ong•atangaha ine koborna u•iataha.
GSMC-ni tom•aniona pilak Unit-ni President aro Secretary-rangko okamate chanchirimaniko dakangaha. Indake tom•aniko GSMC HQ-ni Co-Chairman Te Balkarin Ch Marak Padot ong•e dilangaha.
Ia tom•ani miksonganiara ia 2023 bilsio maikai kam ka•anggen, Unit-ni dilgiparang baksa chanchirimaniko dakangaha.Indake ia bilsini gisepo dal•begipa tom•bimonganiko Delhi songjinmao ong•atangna gitaba manchiangaha aro pilak A•chik A•songni kona noksikrango Garoland State-ni gimin agantalataniko dakba chanchiangjolaha.
GSMC maming saloba Garoland State-na dabianiko dontongjawa.Gipinrang chonnike rogenchimoba, GSMC gisik saja. Jemangan chonnike roengachim, indakgipa manderangde Garoland State-ni gimin name ma•sijani giminsa ong•a.
“Garoland State, GSMC-na ong•ja, indiba an•chingni bi•sarang aro dal•drobaenggipa chadamberangnasa ong•gen. Anga siangoba, Garoland State-ko ra•e siangjawa, an•chingni bi•sarangnan Garoland State ong•gen. Uni gimin
hai angni ma•a paa, jonggipa nogipa, mosa boning, Nokma Sordar, MDC, MLA pilakan apsan Garoland State-ko dabina” ine Balkarin Marak ku•mongangaha..
Indake ia tom•anio GHADC-ni CEM aro GSU-ni gitcham President Te PK Sangma-ko GSMC-ni Chief Adviser aro Te Jakrak A Sangma-ko Co-Chairman-na gital dilgiparangko seokangaha. Jakrak A.Sangma jean Mizoram a•doko LLB aro MA-ko Mizoram-o poraie matchotachim, uamang sakgniko GSMC-ni gital dilgipana seokangaha ine GSMC HQ-ni Additional General Secretary Boatone M.Sangma u•iataha.