Shillong, March 5,2022: West Khasi Hills a•jani ning•o donggipa Nengchigen songni saksa Ma Kristina Marak an•tangko Nokma ine a•kange uni a•kingni ning•oniko niam gri koila bikotenga ine February jani 18 tariko badi ka•ani bidingo Nengchigen songni Nokma Sandil G Marak badi ka•angdapskaha.
Nengchigen songni Nokma Sandil G Marak-ni u•iatani gitade ua Nengchigen songko man•badile on•gipa Ma Denje G Marak aro Pa Rahen R Sangma-ni su•gipa Nokmani ja•chong ong•an baksana Nongstoin Rajani ra•chakako man•ne aro Ga•re Maharini seokako man•ne Nokma ong•engachim.
“Angasa Nokmani asol ja•chong ong•a, angni ma•a ambisa ia songko man•ne on•an baksana jinmani seokako man•gipa Nokma angasa. Uni gisepon re•anggipa February 18 tariko Nengchigen songni saksa Ma Kristina Marak an•tangko Nokma ine a•kange pulis stationo angni adatang saksnini kosako badi ka•an baksana songbadrango aro social mediarango uni a•kingoniko niam gri koila bikotenga ine jangataha. Uni indake dos gri manderangko tol•e matnangenba badi ka•aniara kakket ong•ja, A•kingshipna dakgrikmiting somoion Court-ni dongimin niam dongani a•selo darangba niam gri koilarangko bikotna man•ja. Angni adatangrangoni saksa Arneth G Marak, ua Rajani ra•chakako man•ne, Agent ong•enga” ine Nokma Sandil Marak u•iataha.
Ma Kristina Marak-ni badi ka•anio janapgimin kattarangna talataniko on•engon, chingni songni manderang darangba silchi dare ra•bitgipa manderang baksa melia dongja aro ia kattarangara uni taridapgipa kattarangsan ong•aia. Unbaksana songni manderangko pulisrang baksa melie koila salenggipa gari bol prakoniko gong 500 gilrikenga ine agananikoba jegalatan baksana songo gital dake koila bikotgipa dongjagenchimode, songni manderangara banoniko aro badia garioniko tangka gilrikgen ine sing•doangskaha.
Ua songni manderangko tol•e matnangan baksana angni adatang saksnini kosako tol•e badi ka•aniara jinmani nikanio ua an•tangko nama ine mesokan baksana gipin a•jani aro songni manderangna an•tangko Nengchigen songni Nokma ine biming man•na sike tol•pinike kam ka•anisan ong•aia ine Nengchigen-ni Nokma Sandil G Marak parakataha.
Ma Kristina Marak aro uni dolrang A•kingna aro Agent-na mikboke tol•e badi ka•engachim, indiba Kachario dakgrikanio uamang pangnan amsimja maina uamango Nokma ong•baani ja•pang ja•dilkoko mesokna maming sakki gri ineba ua agandapataha.