Tura, March 5, 2022:Garo Hills Autonomous District Council (GHADC)-ni gital Chairman-ko seokna sukrobar salo eleksin ong•atanio, warachakenggipa All India Trinamool Congress (AITC) dolni membor saksa NPP-ni candidate-na pu•one cheatani ja•manoba, GHADC-ni gital Chief Executive Membor (CEM)-na eleksin-ko March-ni 5 tarik Sonibar salo ong•atangaha.
NPP dolni gital CEM-na Siju-ni NPP MDC Albinush R Marak-ko minge donsomanahaoba warachakenggipa AITC dolni candidate ba Naguapara-ni MDC aro gitcham Executive Membor, Dhormonath Ch Sangma-ba, CEM-na susaangaha, indiba chena gita man•jaha.
GHADC-ni gital CEM-na Sonibar salo eleksin ong•atanio Siju-ni NPP MDC Albinush R.Marak king 17 vote-rang man•ahaon, Dhormonath Ch.Sangm king 12 vote-rangkosan man•rikaiaha. Indake Albinush R.Marak king 5 vote-rangchi Dhormonath Sangma-ko ammaha aro GHADC-ni gital CEM-na seokako man•aha.
Dhormonath Sangma warachakenggipa dolni candidate ong•e CEM-na susaengon, Benedic Marak-ni CEM ong•engmiting somoio uaba NPP-chi dilanggipa Executive Committee-o executive membor ong•ahachim.
NPP dolni gital CEM-na minge donako man•gipa Siju-ni MDC Albinush Marak, GHADC-ni gitcham Deputy Chairman ong•achim, indiba uko CEM-na biming mingahani gimin ua Deputy Chairman-ko wataha aro uni ja•mano ua CEM-na seokako man•aha.