Tura, January 11, 2022: Meghalaya Trinamool Congress (TMC) a•dokni chadamberangna Meghalaya Youth Empowerment (MYE) Scheme-ko a•bachengate on•aha. Indake TMC-ni a•bachengate on•ani adita salrang jamano a•dokni chadamberang hajar 30-na bate bimingtangko segataha ine parakataha.
MYE Scheme-ko a•bachengaton TMC dolko sorkari rikna cholko on•genchimode, lak 30 kamrangko bikote on•gen. Unbaksana kam gri roenggipa chadamberangna japrako gong hajar 1000 prak ka•e, bilsio hajal 12000-ko on•gen ine parakataha.
A•dokni chadamberang jemangan bilsi 21-oni 40 ong•giparang kam gri roengachim, uamangna Meghalaya TMC dakchakaniko on•na miksongenga. Indake a•dokni chadamberang, jemangan bimingtangko MYE Scheme-o segatahachim, uamangna dingtangmancha MYE Card-ko on•gen, jean Scheme-o pangchakani gam gitaba ong•gen. Chadamberang www.tmcmyecard.com ona napange, online register ka•na gita man•gen ineba u•iataha.