Tura, December 3, 2021: Meghalaya Youth Congress (MYC)-ni President, Richard Mrong Marak Sujrobar salo kam watani chittiko Indian Youth Congress (IYC)-ni President, Sriniwas BV-na watataha ine u•iataha.
Richard Marak-ni janapatani gitade, ua manderangna aro Congress partyna dangdike on•na gita, Indian Youth Congress-o napaha.Indiba da•alo Indian National Congress (INC)-ni bang•a dilgiparang dongjahani gimin mikkangchi partyna dangdike on•angkuna gita maming ka•dongani ba bil dongjaha ine u•iataha.
Uni gimin December 3 tarikdipet MYC-ni President aro Congress-o primary membership ong•aniko kam wataha ine Richard Marak u•iataha.
Unbaksana Tura-ni District Congress Committee (DCC)-ni gitcham General Secretary, Sapford N.Sangma Congress Party-o primary membership ong•aoniko kam watani chittiko DCC-ni President-na seataha.
Uni janapata gitade, ua an•tangni gelna man•telgijagipa kamrang dongani gimin Congress party-o member ong•angkuna man•jaha ine u•iataha.
Uni DCC-o General Secretary ong•mittingo sakanti party-ni manderang ku•monge apsan kamrangko ka•anina Congress party-ni manderangko mittele, ua an•tango donggipa pilak lekkarangko DCC-ni President-na wakwataha ineba u•iataha.