Tura, December 3, 2021: Tura-oni adita chel•ai donggipa Ballonggre kal•chakram biapo District Athletic Meet-ko re•baenggipa December 8 tariko ong•atenga.
Ia kal•susaaniko Skulrang, Club-rang aro Association-rangni chadamberang jemangan bilsi 18-ni ning•o ong•enggipa me•asarang aro me•chikrangna District Sports Officer baksa West Garo Hills-ni District Administration nangrime ong•atenga.
Ia kal•susaanio bakko ra•na gita District Sports Officer-o bon•kame entry ka•ani December 6 tariko ong•gen.
Iano kal•susaaniranga miter 100, miter 400, miter 1500-ko katausaani, long jump, high jump, discus throw aro shot put dong•gen aro ia kal•susaanirango chegiparangna namgipa boksisrangko on•gen ine u•iataha.