Williamnagar, November 23, 2022: Garo Students Union (GSU) Eastern Zone, West Jaintia Hills a•jani Mukroh songo a•sel ong•e sianggipa nokdangni manderangna duk ong•e kalimpaaniko prakataha.
November 22 tariko West Jaintia Hills a•jani Mukroh songo ong•gipa obostako GSU-EZ jegalatenba, “Mukroh songo a•sel ong•aniara Assam pulisrangni gualani ong•chongmota.Ia a•sel ong•anio sianggipa nokdangni manderangna kraa gita compensation-rangko sorkari on•na nangchongmota. Unbaksana a•dok sorkari ta•raken sima ari jolrango Pulis Outpost aro Pulis Station-rangko donna nanga. Ru•uta bilsirangna Assam aro Meghalaya a•dokni sima ari jolo dongenggipa manderang tom•tom aro melie nangrime dongenga. Indiba Assam a•dokni pulisrang melie nangrime donganiko nosto ka•aha. Bang•a changon Assam pulisrang, gipin a•dokni garirangko dongdipate tangka gilrikronga. Iako Assam a•dok gita songreenggipa pilak a•dokni manderang chagronga. Chinga Assam pulisrangni kamko raken jegala aro ra•chakja” ine GSU Eastern Zone-ni President Saljrang Tengrik R Marak janapataha.
“Chinga sianggipa nokdangni manderang baksa kalimpaaniko mesokna gita 24 tariko gisim ba•rarangko ra•bite ba ganne tom•aniko dakanggen ineba parakataha.