Tura, Aug 20, 2022: Meghalaya aro Assam a•dok damgnini sorkarirang re•anggipa March 29 tariko Memorandum of Understanding (MoU)-o soi ka•grikani a•sel Meghalaya a•dokni ning•o ga•akgipa adita A•chik songrangko Assam-chi pakwatatani gimin jegale namnikgijaniko mesokna, August 22 tarik Sombar salo Garo Hills-ni dolbri NGO-rang ADE, FKJGP, AYWO aro FAF Shillong Civil Hospital sambao donggipa U-Kiang Nangbah-ni bimangko tarie dongipa biapo asonge jingjengataniko dakanggen ine parakataha.
NGO dilgiparangni parakatani gitade, Meghalaya aro Assam sorkarini Skotong Minister-rang Conrad Sangma aro Himanta Biswa Sarma MoU-o ka•grikani a•sel Meghalaya a•dokni adita A•chik songrang Assam a•doko napangahani gimin ua songrangni dingtang dingtang dolrang Garo Hills-ni NGO-rangko dakchakchina mol•molatahani gimin batanggimin salrango changni chang tom•bimonganirangko ong•ate, MoU-ko den•galpilchina a•dokni skotong minister Conrad Sangma-ko didiatahachim, indiba a•dok damgnini sorkarirang soi ka•gimin MoU-ko den•galpilna aro kamko nipiltaina jechake dongenga.
Meghalaya a•doko ga•akgipa A•chik songrangko Assam a•doko napatahani a•sel ua songrango donggipa manderang duk mikchi ong•e dongna nangengani gimin, “Chinga changni chang a•dokni dilgiparangko aro a•dok sorkariko mol•molahachim, indiba chingni mol•molaniko knachakjaenga. Uni gimin, A•chikskani duk mikchi ong•ani somoio dakchakpana gita an•ching A•chik jat sakantian bakrimaniko on•na nangenga” ine ADE HQ-ni President Dalseng Bira Ch.Momin parakataha.
Indake ong•engon, dolbri NGO-rangni asonge jingjengatanio sakantian re•bae bakko ra•epachina dingtang dingtang dolrangko aro a•doko songdongenghipa manderangko Dalseng Bira Momin mol•molataha.